विश्व खबर 
काठमाडौं– रूसी राष्ट्रपति भ्लादिमिर पुटिनले आफ्नो ७४औँ जन्मदिन मनाइरहँदा रूसी सेनाले युक्रेनको राजधानी किएभमा ठूलो क्षेप्यास्त्र तथा ड्रोन हमला गरेको छ ।
बुधबार गरिएको उक्त हमलामा दुई जनाको मृत्यु भएको किएभका मेयर भिताली क्लित्स्कोले बताएका छन् ।
यसअघि युक्रेनी राष्ट्रपति भोलोदिमिर जेलेन्स्कीले राजधानीमा ठूलो स्तरको हमला हुन सक्ने चेतावनी दिएका थिए ।
पछिल्ला केही सातायता किएभमा रुसी आक्रमण बढ्दै गएको छ ।
जाडोयाम नजिकिँदै गर्दा ऊर्जा पूर्वाधारलाई लक्षित गरी आक्रमण तीव्र बनेपछि राजधानीमा हवाई हमलाको चेतावनी दिने साइरन पटक–पटक बज्ने गरेको छ ।
युक्रेनी गुप्तचर निकायहरूले पुटिनको जन्मदिनकै अवसरमा ठूलो रूसी हमला हुन सक्ने पूर्वानुमान गर्दै नागरिकलाई सचेत गराएका थिए ।
बुधबार बिहानै किएभसहित देशका विभिन्न क्षेत्रमा हवाई हमलाको चेतावनी जारी भएपछि स्थानीय बासिन्दा भूमिगत मेट्रो स्टेसनमा आश्रय लिन पुगेका थिए ।
उनीहरूले झोला, सुत्ने म्याट र कम्बलसमेत लिएर सुरक्षित स्थानमा पुगेका थिए ।
बैंकमा काम गर्ने इरिना रिबाल्चेन्कोले आफूहरू घर नजिकैको मेट्रो स्टेसनमा आश्रय लिन पुगेको बताइन् ।
उनले भनिन्, ‘हामीले सामान लिएर यहाँ आयौँ, हामी यहीँ नजिकै बस्छौँ । पूरा किएभ डरको अवस्थामा छ । आज हामी काममै अड्किएका थियौँ र सबैले हाम्रा समूहका च्याटदेखि हाकिमसम्म सावधान रहन भनिरहेका थिए ।’
ऊर्जा पूर्वाधार र यातायात संरचना निशानामा
रुसी आक्रमणमा ऊर्जा पूर्वाधारसँगै रेल तथा सडक यातायातका संरचनालाई समेत लक्षित गरिएको छ ।
डिनिप्रो नदीको दुवै किनार जोड्ने पुलहरूसमेत पछिल्ला आक्रमणको निशानामा परेका छन् ।
रुसको रक्षा मन्त्रालयले बुधबार आफ्ना सेनाले किएभसहित युक्रेनका विभिन्न क्षेत्रमा रहेका सैन्य–औद्योगिक संरचनामाथि ठूलो स्तरको हमला गरेको जनाएको छ ।
मन्त्रालयका अनुसार जमिन, समुद्र र हावाबाट प्रहार गर्न सकिने उच्च परिशुद्धताका हतियार तथा ड्रोन प्रयोग गरिएको थियो ।
रुसी रक्षा मन्त्रालयले किएभमा फायर पोइन्ट कम्पनीले फ्लेमिङ्गो क्रुज क्षेप्यास्त्र तथा मध्यम र लामो दूरीका ड्रोन उत्पादन तथा भण्डारण गर्ने स्थानलाई समेत निशाना बनाइएको दाबी गरेको छ ।
त्यसैगरी किएभ, चेर्निहिभ, किरोभोहराद, डिनिप्रोपेत्रोभ्स्क, पोल्टाभा र खार्किभ क्षेत्रका विभिन्न स्थानमा पनि हमला गरिएको उसको भनाइ छ ।
ओदेसा क्षेत्रमा रहेका बन्दरगाह तथा जहाज मर्मतसम्बन्धी पूर्वाधार र युक्रेनी सेनाको हितमा प्रयोग भइरहेको दाबी गरिएका केही पानीजहाजलाई समेत निशाना बनाइएको रुसी रक्षा मन्त्रालयले जनाएको छ ।
किएभमा दुई जनाको मृत्यु
किएभका मेयर क्लित्स्कोका अनुसार बुधबारको आक्रमणपछि डार्नित्स्की जिल्लामा लागेको आगलागीमा दुई जनाको मृत्यु भएको छ ।
उनले सामाजिक सञ्जाल टेलिग्राममार्फत दुई जनालाई उद्धार गरिएको र आगो नियन्त्रणमा लिने क्रममा दुई जनाको शव फेला परेको जानकारी दिएका छन् ।
यसअघि राष्ट्रपति जेलेन्स्कीले आफ्नो रात्री सम्बोधनमा नागरिकलाई हवाई हमलाको साइरनप्रति सचेत रहन आग्रह गरेका थिए ।
उनले भनेका थिए, ‘रूसी पक्षले ठूलो स्तरको हमला गर्ने तयारी गरिरहेको अद्यावधिक गुप्तचर सूचना प्राप्त भएको छ ।’
युक्रेनी सेनाले आफ्नो प्रतिकारका लागि तयारी गरिरहेको बताउँदै उनले देशको हवाई प्रतिरक्षा प्रणालीले अनुमति दिएसम्म जवाफी कारबाही गरिने बताएका थिए ।
जेलेन्स्कीको सम्बोधनलगत्तै विद्युत् प्रणालीमाथिको दबाब कम गर्न किएभका केही क्षेत्रमा योजनाबद्ध विद्युत् कटौती गरिएको थियो ।
त्यसपछि युक्रेनी वायुसेनाले किएभतर्फ ब्यालिस्टिक क्षेप्यास्त्र आइरहेको चेतावनी दिएको थियो ।
सुमी क्षेत्रमा पनि रुसी ड्रोन हमला
युक्रेनको उत्तरपूर्वी सुमी क्षेत्रमा गरिएको रुसी ड्रोन हमलामा दुई जनाको मृत्यु भएको र दर्जनौँ घाइते भएको युक्रेनी राष्ट्रिय प्रहरीले जनाएको छ ।
घाइतेमध्ये सात, १४ र १६ वर्षका तीन बालबालिका पनि छन् ।
उनीहरू बसोबास गर्ने एउटा अपार्टमेन्टमा हमला भएपछि घाइते भएको प्रहरीले जनाएको छ ।
युक्रेनी सेनाले दक्षिणपूर्वी जापोरिजियातर्फ पनि ब्यालिस्टिक क्षेप्यास्त्र आइरहेको चेतावनी दिएको थियो ।
त्यहाँको यातायात पूर्वाधारमा आक्रमणबाट क्षति पुगेको स्थानीय अधिकारीहरूले बताएका छन् ।
किएभ युद्धको अवस्थाका लागि तयार रहनुपर्छ
किएभका मेयर क्लित्स्कोले गत साता नै राजधानीलाई युद्धको अवस्थाका लागि तयार रहनुपर्ने बताएका थिए ।
उनका अनुसार रूसी सेनाले पुल र ऊर्जा पूर्वाधारमाथि निरन्तर हमला गर्दै राजधानीलाई छिन्नभिन्न पार्ने प्रयास गरिरहेको छ ।
यसैबीच युक्रेनी राष्ट्रपति जेलेन्स्कीले गत साता रूसी राष्ट्रपति पुटिनले आफ्ना सैन्य नेतृत्वलाई युद्धका नियम त्याग्न आदेश दिएको आरोप लगाएका थिए ।
जेलेन्स्कीका अनुसार उक्त आदेशपछि रुसले अस्पताल र विद्यालयलगायत नागरिक पूर्वाधारमाथिको आक्रमण थप तीव्र बनाएको हो ।
उनले यस्तो दाबी फाइनान्सियल टाइम्स सँगको कुराकानीमा गरेका थिए ।
युक्रेनमाथि रूसको आक्रमण जारी रहँदा आगामी जाडोयाममा ऊर्जा पूर्वाधारलाई लक्षित गरी थप हवाई हमला हुन सक्ने आशंका युक्रेनी अधिकारीहरूले व्यक्त गर्दै आएका छन् । –डेली मेल
