विश्व खबर 
काठमाडौं – अमेरिकामा देशनिकालासम्बन्धी कानुनी लडाइँ लडिरहेका किलमार अब्रेगो गार्सियाको मंगलबारका लागि तय गरिएको अदालतको सुनुवाइ अन्तिम समयमा रद्द भएको छ ।
अब्रेगो गार्सिया मंगलबार मेरील्यान्डस्थित संघीय अदालत पुगेका थिए । तर, अदालत पुगेपछि न्यायाधीशले सुनुवाइ अघि बढाउन नसकिने बताएपछि कार्यक्रम रद्द गरिएको हो । उनका वकिल साइमन सान्डोभाल–मोसेनबर्गका अनुसार अब मुद्दाको आगामी प्रक्रिया अदालतका अभिलेखमार्फत सार्वजनिक गरिनेछ ।
अब्रेगो गार्सिया मेरील्यान्डमा आफ्नी श्रीमती र बच्चाहरूसँग बस्दै आएका थिए । तर, मार्च २०२५ मा उनलाई गल्तीवश एल साल्भाडोर निर्वासित गरिएको थियो । त्यहाँ उनलाई कुख्यात सिइसिओटि कारागारमा राखिएको थियो । उनलाई एल साल्भाडोर पठाउन नहुने विषयमा सन् २०१९ मै अमेरिकी अदालतले आदेश जारी गरेको थियो ।
अमेरिकी राष्ट्रपति डोनाल्ड ट्रम्पको प्रशासनले अब्रेगो गार्सियालाई आपराधिक समूह एमएस–१३ सँग सम्बन्धित रहेको आरोप लगाएको थियो । अब्रेगोले भने उक्त आरोप अस्वीकार गर्दै आएका छन् ।
अमेरिकी सर्वोच्च अदालतको आदेशपछि उनलाई पछि अमेरिका फिर्ता ल्याइएको थियो । अमेरिका फर्किएपछि उनीमाथि मानव तस्करीसम्बन्धी अभियोगसमेत लगाइएको थियो । तर, संघीय अदालतले उक्त अभियोग खारेज गर्दै सरकारी अनुसन्धानमा ‘बदला लिने उद्देश्य’ देखिएको टिप्पणी गरेको थियो ।
यसबीच ट्रम्प प्रशासनले अब्रेगो गार्सियालाई अमेरिका बाहेक अर्को तेस्रो देशमा पठाउने प्रयास जारी राखेका छन् । उनलाई इस्वाटिनी, लाइबेरिया वा युगान्डामध्ये कुनै एक देशमा पठाउने सम्भावनाबारे चर्चा हुँदै आएको छ ।
तर, उनका कानुनी प्रतिनिधिहरूले भने उनलाई कोस्टारिका पठाइनुपर्ने माग गर्दै आएका छन् । अब्रेगो गार्सियाको देशनिकाला, हिरासत र अमेरिकामा उनको कानुनी हैसियतसम्बन्धी विवादले ट्रम्प प्रशासनको आप्रवासन नीतिमाथि समेत निरन्तर कानुनी प्रश्न उठाउँदै आएको छ ।
मंगलबारको सुनुवाइ रद्द भएपछि अब्रेगो गार्सियाको भविष्यमा कुन कानुनी प्रक्रिया अघि बढ्छ र उनलाई अमेरिका बाहिर पठाउने प्रशासनको प्रयास कसरी अगाडि बढ्छ भन्ने विषय अदालतका आगामी अभिलेखबाट स्पष्ट हुने आशा गरिएको छ ।
