विश्व खबर 
काठमाडौं– ऊर्जा, जलस्रोत तथा सिँचाइमन्त्री विराज भक्त श्रेष्ठले बहालवाला सुरक्षाकर्मीलाई जलविद्युत् आयोजनाको प्राथमिक शेयरमा दुई प्रतिशत सहभागिता सुनिश्चित गर्ने कानुनी प्रक्रिया अघि बढाइएको बताएका छन् ।
प्रतिनिधिसभा बैठकलाई सम्बोधन गर्दै मन्त्री श्रेष्ठले भोटेकोशी–त्रिशूली बाढीका क्रममा सुरक्षाकर्मीले गरेको खोज, उद्धार तथा पुन:स्थापनाको योगदानको सम्मानस्वरूप यस्तो व्यवस्था गर्न लागिएको बताएका हुन् ।
यस्तै, बाढीमा ज्यान गुमाएका वा सम्पर्कविहीन नेपाल विद्युत् प्राधिकरणका कर्मचारीका परिवारलाई तत्काल ५ लाख रुपैयाँ राहत र ६ महिनासम्म तलबको ५० प्रतिशत रकम उपलब्ध गराउने निर्णय भएको उनले जानकारी दिए ।
बाढी प्रभावित विद्युत् ग्राहकलाई भदौदेखि न्यूनतम बिलिङ नगर्ने, क्षतिग्रस्त मिटरको लगत कट्टा गर्ने र नयाँ मिटर नि:शुल्क उपलब्ध गराउने व्यवस्था गरिएको छ । १५ स्थानीय तहका प्रभावित ग्राहकलाई थप महसुल सहुलियत दिनेबारे पनि अध्ययन भइरहेको मन्त्री श्रेष्ठले बताए ।
