विश्व खबर 
काठमाडौं – लगातार तीन कारोबार दिन बढेको नेपाल स्टक एक्सचेन्ज (नेप्से) परिसूचक बुधबार भने २१.१९ अंकले घटेको छ । यससँगै नेप्से २ हजार ६१२.४२ विन्दुमा झरेर बन्द भएको छ ।
पछिल्ला तीन कारोबार दिनमा नेप्से १०२.०६ अंकले बढेको थियो । बजारमा भएको वृद्धिपछि लगानीकर्ताले नाफा सुरक्षित गर्न थालेसँगै बुधबार बिक्री चाप बढेको हो ।
यस दिन सेन्सेटिभ इन्डेक्स ३.७७ अंकले घटेको छ । फ्लोट इन्डेक्स १.५० अंक र सेन्सेटिभ फ्लोट इन्डेक्स १.३२ अंकले घटेका छन् ।
कारोबार रकममा पनि कमी आएको छ । मंगलबार ८ अर्ब २९ करोड रुपैयाँभन्दा बढीको कारोबार भएकोमा बुधबार ५ अर्ब ३८ करोड ९५ लाख ७४ हजार रुपैयाँबराबरको शेयर कारोबार भएको छ ।
बुधबार ३५० कम्पनीका १ करोड ५१ लाख १ हजार कित्ता शेयर ५५ हजार ८३१ पटकको कारोबारबाट खरिदबिक्री भएका छन् ।
नारायणी विकास बैंकको शेयरमूल्य बढ्यो
बुधबार नारायणी डेभलपमेन्ट बैंकको शेयरमूल्य सर्वाधिक ६.३७ प्रतिशतले बढेको छ । हिमाल दोलखा हाइड्रोपावरको शेयरमूल्य पनि करिब साढे ५ प्रतिशतले बढेको छ ।
यस दिन एनएमबी हाइब्रिड फन्ड एल–२ को इकाइमूल्य सर्वाधिक ७.७३ प्रतिशतले घटेको छ । रिज लाइन इनर्जीको शेयरमूल्य पनि ५ प्रतिशतभन्दा बढीले घटेको छ ।
हिमाल दोलखा हाइड्रोपावरको सर्वाधिक कारोबार
कारोबार रकमका आधारमा हिमाल दोलखा हाइड्रोपावर शीर्ष स्थानमा रहेको छ । कम्पनीको ३७ करोड ९५ लाख ६४ हजार रुपैयाँबराबरको शेयर कारोबार भएको छ ।
रिलायन्स स्पिनिङ मिल्सको २५ करोड रुपैयाँभन्दा बढी र शिवम् सिमेन्टको १६ करोड ५० लाख रुपैयाँभन्दा बढीको कारोबार भएको छ ।
१३ वटै उपसमूहमा गिरावट
बुधबार नेप्सेका सबै १३ उपसमूहको परिसूचक घटेका छन् । जलविद्युत उपसमूह १.०४ प्रतिशतले घटेर सबैभन्दा ठूलो गिरावट भएको उपसमूह बनेको छ ।
जीवन बीमा उपसमूहको परिसूचक १ प्रतिशतभन्दा बढी र निर्जीवन बीमा उपसमूहको परिसूचक करिब १ प्रतिशतले घटेको छ ।
पछिल्ला तीन कारोबार दिनमा भएको उल्लेख्य वृद्धिपछि बुधबार बजारमा आएको गिरावटलाई नाफा सुरक्षित गर्ने क्रमसँग जोडिएको छ ।
