विश्व खबर 
काठमाडौं– रसुवाको रसुवागढी–केरुङ र तातोपानी नाका बाढीपहिरोका कारण पूर्ण रूपमा बन्द भएपछि चीनसँगको उत्तरी कोरलानाकाबाट हुने मालवस्तुको आयात ह्वात्तै बढेको छ । मुस्ताङको लोमान्थाङ गाउँपालिका–४ न्हेचुङस्थित मुस्ताङ भन्सार कार्यालयले पछिल्लो १५ दिनमै एक अर्ब ७८ करोड ४४ लाख रुपैयाँ राजस्व संकलन गरेको छ ।
भन्सार कार्यालयका प्रमुख विदुर चुडालका अनुसार रसुवागढी–केरुङ र तातोपानी नाका बन्द भएपछि चीनबाट आउने मालवस्तुको आयात कोरलानाकातर्फ केन्द्रित भएको हो ।
उनका अनुसार भदौ २२ गतेपछि कोरलानाकाबाट दैनिक औसत ३० करोड रुपैयाँ हाराहारी राजस्व संकलन भइरहेको छ ।
शुक्रबार मात्रै मुस्ताङ भन्सार कार्यालयले २७ करोड ११ लाख रुपैयाँ राजस्व संकलन गरेको छ । सो दिन ७१ वटा कन्टेनर र १०६ वटा विद्युतीय सवारीसाधनको भन्सार जाँचपास गरी गन्तव्यतर्फ पठाइएको भन्सार प्रमुख चुडालले जानकारी दिए ।
रसुवागढी नाका भदौ १० गतेदेखि बन्द भएपछि भदौ २५ गतेसम्म कोरलानाकाबाट नेपाल भित्रिएका ४३४ वटा कन्टेनर र ६४१ वटा विद्युतीय सवारीसाधनको भन्सार जाँचपास गरिएको छ ।
चालु आर्थिक वर्ष २०८३/८४ को साउनदेखि भदौ २५ गतेसम्म कोरलानाका हुँदै नेपाल भित्रिएका कन्टेनर तथा विद्युतीय सवारीसाधनको भन्सार जाँचपासबाट दुई अर्ब ३१ करोड ४४ लाख रुपैयाँ राजस्व संकलन भएको भन्सार कार्यालयले जनाएको छ ।
भदौ ९ गतेसम्म भने कोरलानाकाबाट १३३ वटा कन्टेनर र १६३ वटा विद्युतीय सवारीसाधन नेपाल भित्रिएका थिए । त्यसयता नाकाबाट हुने आयातमा उल्लेख्य वृद्धि भएको देखिएको छ ।
उपल्लो मुस्ताङका नागरिकका लागि मात्र बाह्रै महिना खुला रहने गरेको कोरलानाका गत वर्ष तातोपानी र रसुवागढी नाकामा आएको बाढीपहिरो तथा नदी कटानका कारण सडक अवरुद्ध भएपछि वैकल्पिक निकासी तथा पैठारी नाकाका रूपमा विस्तार गरिएको हो ।
नेपाल सरकारले गत वर्ष भदौ ३१ गतेदेखि कोरलानाकालाई वैकल्पिक व्यापारिक नाकाका रूपमा सञ्चालनमा ल्याएको थियो ।
भन्सार प्रमुख चुडालका अनुसार आर्थिक वर्ष २०८२र८३ मा उत्तरी कोरलानाकाबाट भएको निकासी तथा पैठारी कारोबारबाट मुस्ताङ भन्सार कार्यालयले छ अर्ब ९२ करोड रुपैयाँ राजस्व संकलन गरेको थियो ।
सो अवधिमा पैठारीतर्फ १४ अर्ब ४१ करोड रुपैयाँ र निकासीतर्फ २० करोड ५० लाख रुपैयाँ बराबरको मालवस्तुको कारोबार भएको थियो ।
त्यस्तै, गत आर्थिक वर्षमा कोरलानाका हुँदै तीन हजार २२३ वटा विद्युतीय सवारीसाधन र एक हजार ८७३ वटा कन्टेनरको भन्सार जाँचपास गरिएको थियो ।
