विश्व खबर 
काठमाडौं– चर्चित पत्रकार प्रेम बानियाँले जेन–जी आन्दोलनको एक वर्ष पुगेको सन्दर्भमा राजनीतिक नेतृत्वप्रति तीखो प्रश्न उठाउँदै अब पनि पुरानै शैलीको राजनीति दोहोर्याउने कि देश निर्माणमा लाग्ने भन्ने प्रश्न गरेका छन् ।
बानियाँले सामाजिक सञ्जालमार्फत ‘जेने–जी विद्रोहको एक वर्ष’ पुगेको उल्लेख गर्दै लेखेका छन्, ‘भाग्ने हेलिकोप्टर पनि नपाइएला है !’
उनले देश–सत्ताको ‘तालाचाबी’ लिएका राजनीतिक नेतृत्वलाई लक्षित गर्दै अब पुराना पुस्तालाई धम्क्याउने र गाली गर्ने, ३५ वर्षलाई सराप्ने, राष्ट्रिय सभा, संघ वा पालिकाहरूलाई हेप्ने तथा राष्ट्रपतितिर चोर औँला तेस्र्याउने काम बन्द गर्ने कि नगर्ने भन्दै प्रश्न गरेका छन् ।
त्यसैगरी, बानियाँले बहुमत दिएका जनतालाई गाली गर्न, बहाना बनाउन र जनतालाई झुक्याउन बन्द गर्ने कि नगर्ने भन्दै प्रश्न गर्दै ‘अब त देश बनाउन सुरू गर्ने कि ? अब त आफैँ सोच्ने कि ? कि अझै केही बाँकी छ ?’ भनेर राजनीतिक नेतृत्वको ध्यानाकर्षण गराएका छन् ।
उनले नयाँ पुस्ताबाट प्राप्त शक्तिलाई सही दिशामा प्रयोग गर्न पनि आग्रह गरेका छन् । ‘यत्रो शक्ति प्राप्त गरेर पनि तीव्र गतिमा काम गरेनौँ भने साथीहरू तिमीहरूले त ‘भाग्ने हेलिकप्टर’ पनि नपाउलाउ है, विचारै गरेर काम गर । इतिहासकै विशाल अवसर छ, उपयोग गर,’ उनले लेखेका छन् ।
बानियाँ लामो समयदेखि खोजमूलक तथा अनुसन्धानात्मक पत्रकारितामा परिचित नाम हुन् । उनको आफ्नै परिचयमा पनि पत्रकारिता, सामाजिक अभियान र ‘जय स्वाभिमान’ लगायतका अभियानलाई प्राथमिकताका साथ अघि बढाउँदै आएका छन् ।
समग्रमा, बानियाँको पछिल्लो अभिव्यक्तिले जेन–जी आन्दोलनपछि प्राप्त राजनीतिक अवसरलाई पुरानै आरोप–प्रत्यारोपमा खर्च नगरी परिणाममुखी काममा बदल्नुपर्ने सन्देश दिएको छ ।
