विश्व खबर 
विराटनगर– कोशी प्रदेशमा स्थापनाको साढे आठ वर्षमा नौ पटक मुख्यमन्त्री परिवर्तन हुँदा ११८ जना मन्त्री बनेका छन् ।
सरकार गठन, पुनर्गठन र मन्त्रालय हेरफेरको क्रमले प्रदेशको राजनीतिक अस्थिरता बढाएको तथ्यांकले देखाएको छ ।
प्रदेश स्थापनादेखि हालसम्म ६ जना व्यक्ति मुख्यमन्त्री बनेका छन् ।
एमालेका हिक्मत कार्की तीन पटक र कांग्रेसका उद्धव थापा दुई पटक मुख्यमन्त्री बने ।
दोस्रो प्रदेश सभा कार्यकालमा मात्रै ६७ जना सांसद मन्त्री र १४ जना राज्यमन्त्री बनेका छन् ।
राजनीतिक अस्थिरतासँगै बजेट कार्यान्वयन पनि कमजोर देखिएको छ ।
नौ आर्थिक वर्षमा प्रदेशले कुल २ खर्ब ९७ अर्ब २७ करोड रुपैयाँ बजेट विनियोजन गरे पनि २ खर्ब १३ अर्ब ४२ करोड रुपैयाँ मात्रै खर्च गर्न सकेको छ ।
करिब ८३ अर्ब ८५ करोड रुपैयाँ, अर्थात् २८ प्रतिशत हाराहारी बजेट खर्च हुन सकेन ।
औसत बजेट कार्यान्वयन दर ७१.७९ प्रतिशत रहेको छ ।
प्रदेशसभाले हालसम्म ९० वटा कानून बनाए पनि आवश्यक नियमावली, कार्यविधि र मापदण्डको अभावमा धेरै कानून प्रभावकारी रूपमा कार्यान्वयन हुन सकेका छैनन् ।
प्रदेश प्रहरी गठन र लगानी प्रवर्द्धनसम्बन्धी कानूनी व्यवस्था पनि कार्यान्वयनको कमजोरीबाट प्रभावित छन् ।
यस्तै, पछिल्ला वर्षमा वित्तीय अनुशासनमाथि समेत प्रश्न उठेको छ ।
विशेषगरी भौतिक पूर्वाधार विकास मन्त्रालयमा बेरुजु र म्याद नाघेको पेस्कीको समस्या बढी देखिएको छ ।
आन्तरिक राजस्वतर्फ पनि प्रदेशले लक्ष्य भेट्न सकेको छैन ।
आर्थिक वर्ष २०८२÷०८३ मा ५ अर्ब ५० करोड रुपैयाँ लक्ष्य राखिएकोमा ४ अर्ब ७० करोड ८४ लाख रुपैयाँ मात्रै उठेको छ ।
यसले प्रदेशको आफ्नै स्रोत परिचालन अझै कमजोर रहेको देखाउँछ ।
