विश्व खबर 
काठमाडौं– राष्ट्रिय स्वतन्त्र पार्टी (रास्वपा)का सभापति रवि लामिछानेले राष्ट्रपति सी चिनफिङसँग भेट सुनिश्चित भएपछि मात्रै चीन जाने अडान लिएका छन् ।
उनी निकट नेताका अनुसार भदौ पहिलो साताका लागि भ्रमणको तयारी गरिए पनि उच्चस्तरीय भेट नहुने हो भने योजना पुनः स्थगित हुन सक्छ ।
चिनियाँ कम्युनिस्ट पार्टीको निमन्त्रणामा हुने यो पहिलो चीन भ्रमण हो ।
यसअघि असारका लागि तय भएको मिति सीसँग भेट निश्चित नभएपछि सारिएको बताइन्छ ।
लामिछानेले भारत भ्रमणमा प्रधानमन्त्री मोदीलगायत उच्च नेतृत्वसँग भेट गरेको अनुभवलाई आधार मान्दै बेइजिङमा पनि सोही तहको व्यवस्था गर्न चाहेका छन् ।
बेइजिङमा उपराष्ट्रपति र विदेशमन्त्रीसँग भेट लगभग निश्चित छ भने राष्ट्रपति सीको कार्यक्रम भने स्पष्ट छैन ।
चीनले कूटनीतिक प्रोटोकललाई कडाइ गर्ने भएकाले राष्ट्रपति सीले सामान्यतया राष्ट्रप्रमुख वा सरकार प्रमुखलाई मात्र भेट्ने चलन छ ।
यद्यपि, विशेष अवस्थामा विदेशी दलका शीर्ष नेतालाई पनि भेटेका उदाहरण छन् ।
नेपालबाट पुष्पकमल दाहाल ‘प्रचण्ड’ मात्र पार्टी अध्यक्षको हैसियतमा सीसँग भेट्ने नेता हुन् ।
तत्कालीन कांग्रेस सभापति कोइराला र देउवाको भ्रमण भने सीसँग भेट नहुने भएपछि स्थगित भएको चर्चा छ ।
