विश्व खबर 
काठमाडौं– कांग्रेस सभापति गगन थापाको पछिल्लो अभिव्यक्तिपछि नेकपा संयोजक पुष्पकमल दाहाल ‘प्रचण्ड’ कांग्रेससँग प्रदेशमा सत्ता सहकार्यबाट पछि हटेको कांग्रेस र नेकपा दुवै पक्षका नेताहरूले बताएका छन् ।
असार ३० मा गगन र प्रचण्डबीच प्रदेश सरकारमा सहकार्य गर्ने सैद्धान्तिक समझदारी बनेको थियो ।
कांग्रेसले एमालेसँगको सहकार्य तोड्ने तयारी गरेपछि थापाले प्रचण्डसँग छलफल गरेका थिए ।
तर श्रीलंका भ्रमणबाट फर्किएपछि प्रचण्डको धारणा फेरिएको कांग्रेस नेताहरूको दाबी छ ।
प्रचण्डले गगन थापाको २०७२ देखि २०८२ सम्मका १० वर्ष मुलुकका लागि काला दिन थिए भन्ने अभिव्यक्तिप्रति असन्तुष्टि जनाएका थिए ।
उक्त अवधिमा कांग्रेस, एमाले र प्रचण्ड नेतृत्वका सरकारहरू आलोपालो सत्तामा रहेका थिए ।
नेकपा नेताहरूका अनुसार प्रचण्डले गगनको अभिव्यक्तिले पुराना राजनीतिक शक्तिको छवि कमजोर बनाएको निष्कर्ष निकालेका थिए ।
त्यसपछि कांग्रेससँगको सहकार्य चिसिँदै गएको बताइन्छ ।
अन्ततः प्रचण्डले साउन ९ मा एमाले अध्यक्ष केपी शर्मा ओलीसँग तीनबुँदे सहमति गर्दै प्रदेश सरकारहरूको नयाँ बाँडफाँटमा सहमति गरे ।
सहमतिअनुसार कोशी, बागमती र लुम्बिनी एमालेले तथा कर्णाली र सुदूरपश्चिम नेकपाले नेतृत्व गर्ने भएका छन् ।
यसरी गगन थापाको एउटा राजनीतिक टिप्पणीले प्रदेशको सत्ता समीकरण नै फेरिएको र प्रचण्ड फेरि ओलीसँग नजिकिएको विश्लेषण भइरहेको छ ।
