विश्व खबर 
काठमाडौं– एमाले अध्यक्ष केपी शर्मा ओली र नेकपा संयोजक पुष्पकमल दाहाल ‘प्रचण्ड’ले प्रदेश सत्ता समीकरणबारे तीनबुँदे सहमति गरेपछि दुवै दलभित्र असन्तुष्टि चुलिएको छ ।
पार्टी कमिटीमा पर्याप्त छलफल, विगतको समीक्षा र आत्मालोचना नगरी केवल सत्ताका लागि सहमति गरिएको भन्दै विशेषगरी युवा नेताहरूले प्रश्न उठाएका हुन् ।
सहमतिअनुसार कोशी, बागमती र लुम्बिनीको नेतृत्व एमालेले तथा कर्णाली र सुदूरपश्चिमको नेतृत्व नेकपाले गर्नेछ ।
मधेश र गण्डकीमा अन्य दलसँग छलफल गरेर अघि बढ्ने समझदारी छ ।
तर एमालेभित्र मुख्यमन्त्री चयनमै विवाद देखिएको छ भने नेकपामा सहसंयोजक माधव नेपालनिकट नेताहरूले पनि प्रक्रियामाथि असन्तुष्टि जनाएका छन् ।
एमालेका योगेश भट्टराई, गोकुल बाँस्कोटा र विजय सुब्बाले पारदर्शिता, सहभागिता र प्रक्रियामाथि प्रश्न उठाएका छन् ।
नेकपाका नरेश शाही, रञ्जित तामाङ र सुदेश पराजुलीले कमिटीको निर्णयबिनाको सहमति व्यक्तिगत र विवादास्पद बन्न सक्ने बताएका छन् ।
प्रचण्ड पक्षले भने माधव नेपाल असन्तुष्ट रहेको चर्चा हल्लामात्र भएको दाबी गरेको छ ।
सोमबार प्रचण्ड र नेपालबीच प्रदेश सरकार गठन र वाम सहकार्यलाई बलियो बनाउने विषयमा छलफल भएको बताइएको छ ।
यसबीच नेकपाले कर्णालीमा मंगलबहादुर शाही र सुदूरपश्चिममा खगराज भट्टलाई मुख्यमन्त्री बनाउने तयारी गरेको छ ।
