सरकारले मन्त्रालय घटाएर ८ पुर्‍याउँदै, साउनदेखि कार्यान्वयन

प्रदेश प्रमुख कृष्णबहादुर घर्तीमगर ले प्रदेश सभामा प्रस्तुत गरेको नीति तथा कार्यक्रममा हालका १२ मन्त्रालयलाई घटाएर साउन १ गतेदेखि मुख्यमन्त्री कार्यालयसहित ८ मन्त्रालयमा सीमित गरिने उल्लेख छ ।

सरकारले ‘उद्यमशील लुम्बिनी’ र ‘डिजिटल लुम्बिनी’ अभियानलाई रूपान्तरणकारी कार्यक्रमका रूपमा अघि बढाउने भएको छ ।

कृषि क्षेत्रमा अर्गानिक खेती, युवा उद्यमशीलता, बाली विशेष क्षेत्र विकास तथा विभिन्न जिल्लामा कृषि स्रोत केन्द्र स्थापना गरिने नीति लिइएको छ ।

पर्यटनतर्फ लुम्बिनीलाई ‘आरोग्य पर्यटन हब’ बनाउने, लुम्बिनी–मुक्तिनाथ धार्मिक परिपथ तथा लुम्बिनी–स्वर्गद्वारी–बर्दिया ‘सिल्भर ट्राइङ्गल’ विकास गर्ने योजना अघि सारिएको छ ।

पहाडमा बसाइँसराइ रोक्न ‘एक जिल्ला, एक नमुना बस्ती’ कार्यक्रम सञ्चालन गरिने तथा शिक्षा क्षेत्रमा एकीकृत प्रादेशिक शिक्षा नीति ल्याइने उल्लेख छ ।

स्वास्थ्यतर्फ लुम्बिनी र राप्ती प्रादेशिक अस्पतालमा जलन उपचार सेवा विस्तार, प्रत्यारोपण सहुलियत निरन्तरता तथा सबै अस्पतालमा एन्टी रेबिज र सर्पदंश उपचार सामग्रीको नियमित आपूर्ति सुनिश्चित गरिने नीति लिइएको छ ।