विश्व खबर 
काठमाडौं– तराई–मधेस केन्द्रित दलहरू मिलेर बनेको संघीय लोकतान्त्रिक मोर्चा गम्भीर संकटमा परेको छ ।
मोर्चाको नेतृत्व जसपा नेपालका संरक्षक महन्थ ठाकुरले गरे पनि अधिकांश घटक दलहरूको सहभागिता कमजोर बन्दै गएको छ ।
बैठकहरू नियमित भए पनि जसपा नेपालका अध्यक्ष उपेन्द्र यादव सहभागी नहुने, नागरिक उन्मुक्ति पार्टी नेपाल मोर्चाबाट अलग भइसकेको, तमलोपा पनि निष्क्रिय बनेको र जनमत पार्टीका अध्यक्ष सीके राउतको उपस्थिति अनियमित रहेको देखिन्छ ।
मोर्चाभित्र जसपा नेपाल र लोसपा नेपालबीचको एकता प्रक्रिया टुंगिन नसक्दा अन्य दलहरूसँगको एकता अघि बढ्न सकेको छैन ।
नेतृत्व कसले गर्ने भन्ने विषयमा विवाद चर्किँदा एकता प्रक्रिया समेत अवरुद्ध भएको नेताहरूको भनाइ छ ।
यसैबीच, नागरिक उन्मुक्ति पार्टी नेपालका संरक्षक रेशम चौधरीले मोर्चामा बस्नुको औचित्य कमजोर बन्दै गएको बताएका छन् ।
उनले आफू औपचारिक रूपमा बाहिर ननिस्किए पनि व्यवहारिक रूपमा मोर्चा छाडिसकेको संकेत गरेका छन् ।
उनका अनुसार पुरानो ढाँचामा राजनीति चल्न नसक्ने भन्दै नयाँ नेतृत्व र कार्यदिशा आवश्यक छ ।
