विश्व खबर 
काठमाडौं– देशका विभिन्न जिल्लामा आएको अविरल वर्षासँगै पहिरो र बाढीका कारण प्रमुख राजमार्गहरू अवरुद्ध भएका छन् ।
आइतबार बिहान ७ः३० बजेसम्मको विवरणअनुसार बागमतिदेखि कोशी र गण्डकी प्रदेशसम्मका सडकहरू प्रभावित भएका हुन् ।
उपत्यकाअन्तर्गत पाँडुगे क्षेत्रमा गएको पहिरोले कान्तिलोकपथ पूर्णरूपमा अवरुद्ध भएको छ ।
सडक अवरुद्ध हुँदा सवारी आवागमन पूर्णरूपमा ठप्प बनेको छ ।
कोशी प्रदेशतर्फ भोजपुर जिल्लामा आएको बाढीले भोजपुर नगरपालिका–५ बोखिम क्षेत्रको मध्यपहाडी लोकमार्ग प्रभावित बनेको छ ।
उक्त सडकखण्डमा वैकल्पिक बाटोमार्फत एकतर्फी सवारी सञ्चालन भइरहेको जनाइएको छ ।
यस्तै, बागमती प्रदेशका विभिन्न जिल्लामा पनि पहिरोले सडक अवरुद्ध बनाएको छ ।
सिन्धुपाल्चोकको भोटेकोशी गाउँपालिका–२ कोदारीस्थित इदु पहिरो क्षेत्रमा अरनिको राजमार्ग पूर्ण रूपमा बन्द रहेको छ ।
त्यस्तै, मकवानपुरको भीमफेदी गाउँपालिका–८ भैंसेखण्डामा आएको पहिरोले कान्तिलोकपथ सडकखण्ड पूर्ण रूपमा अवरुद्ध भएको छ ।
गण्डकी प्रदेशमा पनि पहिरोको प्रभाव देखिएको छ ।
म्याग्दीको अन्नपूर्ण गाउँपालिका–३ जलजले क्षेत्रमा बेनी–जोमसोम सडकखण्डमा एकतर्फी सवारी सञ्चालन भइरहेको छ ।
साथै, लमजुङको मध्यनेपाल नगरपालिका–१० बिपीचोक क्षेत्रमा गएको पहिरोले मध्यपहाडी लोकमार्ग पूर्ण रूपमा अवरुद्ध भएको छ ।
प्रहरी तथा सम्बन्धित निकायहरूले सडक खुलाउने प्रयास जारी रहेको बताएका छन् ।
यात्रुहरूलाई अत्यावश्यक बाहेक लामो दूरीको यात्रा नगर्न र वैकल्पिक मार्ग प्रयोग गर्न अनुरोध गरिएको छ ।
लगातार वर्षा भइरहेकाले थप जोखिम बढ्न सक्ने भन्दै सतर्कता अपनाउन पनि आग्रह गरिएको छ ।
सूचना :
