विश्व खबर 
इस्लामावादमा भएको अमेरिका–इरान वार्ता निष्कर्षविहीन भएपछि अमेरिकाले इरानमाथि समुद्री नाकाबन्दीको घोषणा गरेको छ।
अमेरिकी सेनाको केन्द्रीय कमान्ड (सेन्टकम)का अनुसार सोमबारदेखि लागू हुनेगरी इरानी बन्दरगाहमा जाने र त्यहाँबाट फर्कने सबै जहाज निगरानीमा रहनेछन्।
हर्मुज जलडमरू हुँदै अन्य देशतर्फ जाने जहाजहरूलाई भने अवरोध नहुने जनाइएको छ। तर इरानी पोर्टतर्फ जाने जहाजहरूमा अमेरिकी नौसेनाले कडा निगरानी राख्नेछ।
हर्मुज जलमार्गमा शुल्क उठाउने इरानको प्रस्तावमा सहमति नजुटेपछि अमेरिका यो कदमतर्फ गएको हो। वार्तामा आणविक कार्यक्रम र क्षेत्रीय समूहहरूलाई इरानको समर्थनजस्ता विषयमा पनि मतभेद रह्यो।
अमेरिकी राष्ट्रपति डोनाल्ड ट्रम्पले इरानलाई शुल्क तिर्ने जहाजहरूलाई रोक्ने चेतावनी दिएका छन् भने इरानले अमेरिकी सैन्य गतिविधिलाई कडा प्रतिकार गर्ने बताएको छ।
यो तनावका कारण विश्व बजारमा तेलको मूल्य बढेको छ र एसियाली शेयर बजारमा गिरावट देखिएको छ।
