विश्व खबर 
काठमाडौं– अभिनेत्री नीता ढुंगानाको डेब्यु निर्देशनमा बन्न लागेको नयाँ नेपाली चलचित्र ‘पार्वर्ती’को छायांकन कास्कीको माछापुच्छ्रे गाउँपालिका, मिर्सा गाउँ (वडा नं. १) मा मंगलबार शुभ(मुहूर्तसँगै सुरु भएको छ ।
चलचित्रमा नीता स्वयं मुख्य भूमिकामा देखिनेछिन् भने बालगायक अशोक दर्जी पनि प्रमुख पात्रमा छन् । उनीहरूले अघि चलचित्र ‘मन बिनाको धन’मा सँगै काम गरिसकेका छन् ।
नीता ढुङ्गाना फिल्मस्को ब्यानरमा निर्माण हुने चलचित्र सामाजिक कथावस्तुमा आधारित रहेको निर्माण पक्षले जनाएको छ । यसअघि सोही ब्यानरबाट ‘ह्रस्वदीर्घ’ निर्माण भएको थियो ।
निर्माता हरिहर अधिकारी रहेका चलचित्रमा दीपाश्री निरौला, सिरु बिष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेल लगायतको अभिनय रहनेछ । कथा र पटकथा नीता ढुंगानाले लेखेका हुन् भने संवाद शिवम् अधिकारीले तयार पारेका छन् ।
नीता चलचित्रमा अटिजम भएका युवतीको भूमिकामा देखिनेछिन् । उनी भन्छिन्, “यो हास्य, भावना र सामाजिक सन्देश मिसिएको कथा हो, जसमा जीवनका रंग, सम्बन्धका मिठास र संघर्षको भाव प्रस्तुत गरिएको छ ।”
सुदिप बराल डीओपी, सरोज अधिकारी क्रियटिभ निर्देशक, शंकर पाण्डे प्रोडक्सन प्रमुख एवं कार्यकारी निर्माता, र साहिल खान सम्पादक रहेका छन् । चलचित्र रक्षा बन्धनको अवसरमा भदौ १२ मा प्रदर्शन हुने तयारी छ ।
