विश्व खबर 
काठमाडौं- कोरोना भाइरस (कोभिड-१९) को ओमिक्रोन समूहबाट एउटा नयाँ र अत्यधिक उत्परिवर्तित भेरियन्ट बीए.३.२ देखा परेको छ, जसलाई वैज्ञानिकहरूले ‘सिकाडा’ नाम दिएका छन्।
जमिनमुनि लामो समय हराएर फेरि निस्कने सिकाडा किराको स्वभावसँग मिल्दोजुल्दो व्यवहार देखाएकाले यसलाई यो नाम दिइएको हो।
यो भेरियन्टको सबैभन्दा अनौठो विशेषता यो छ कि यसले वृद्धवृद्धाभन्दा बढी ३ देखि १५ वर्ष उमेरका बालबालिकालाई लक्षित गरिरहेको छ।
वैज्ञानिकहरूका अनुसार सन् २०२२ मा देखिएको ओमिक्रोनको एउटा हाँगा ‘बीए.३’ रहस्यमय ढंगले हराएको थियो।
विज्ञहरूको अनुमान छ कि यो भाइरस विगत दुई वर्षदेखि कुनै एक यस्तो व्यक्तिको शरीरमा लुकेर बसेको थियो जसको रोग प्रतिरोधात्मक क्षमता निकै कमजोर थियो।
त्यहाँ भाइरस र शरीरबीच लामो संघर्ष चल्दा भाइरसमा भारी उत्परिवर्तन भयो।
नोभेम्बर २०२४ मा दक्षिण अफ्रिकाका एक ५ वर्षीय बालकमा पहिलो पटक देखिएको यो भेरियन्टमा सन् २०१९ को मूल भाइरसको तुलनामा ७० वटा र यसको माउ भाइरसको तुलनामा ५३ वटा ‘स्पाइक प्रोटिन’ उत्परिवर्तनहरू पाइएका छन्।
न्युयोर्क सहरको तथ्यांक विश्लेषण गर्दा अन्य भेरियन्टको तुलनामा बालबालिकाहरू बीए.३.२ बाट संक्रमित हुने सम्भावना ५ गुणा बढी देखिएको छ।
वैज्ञानिकहरूका अनुसार यो भेरियन्टले गम्भीर बिरामी बनाउने वा अस्पताल भर्ना गर्नुपर्ने स्थिति सिर्जना गरेको छैन।
हाल उपलब्ध खोपहरूले यस विरुद्ध राम्रो काम गरिरहेका छन्।
जर्मनीमा एक समय ३० प्रतिशत संक्रमण पुगेको यो भेरियन्ट अहिले विस्तारै घट्दो क्रममा छ।
हालसम्म यो भेरियन्ट विश्वका २३ देश र अमेरिकाका २५ राज्यको फोहोर पानीमा भेटिइसकेको छ।
यद्यपि, यो भाइरस कोषमा छिर्न आवश्यक पर्ने ‘एसीई-२ रिसेप्टर’ सँग बलियोसँग टाँसिन नसक्ने हुनाले यसले अघिल्ला भेरियन्टहरू जस्तो विश्वव्यापी महामारीको ठूलो लहर ल्याउन नसक्ने विज्ञहरूको ठम्याइ छ।
दक्षिण अफ्रिकाका डा. टुलियो डे ओलिभिएराका अनुसार अहिले नै नयाँ खोप अभियान सुरु गरिहाल्नु पर्ने आवश्यकता देखिएको छैन, तर यसको उत्परिवर्तनलाई नजिकबाट नियाल्नु भने जरुरी छ।
