विश्व खबर 
बुटवल– लुम्बिनी प्रदेशको चुनावी परिदृश्यमा नयाँ अनुहारभन्दा पुरानै नेताहरूको पुनरावृत्ति बढी देखिन्छ ।
तीन/चार दशकदेखि एउटै नेताले बारम्बार जनादेश माग्ने प्रवृत्ति यहाँ सामान्यजस्तै बनेको छ ।
नवलपरासीका हृदयेश त्रिपाठी २०४८ सालदेखि निरन्तर चुनावी राजनीतिमा सक्रिय छन् ।
विभिन्न दल परिवर्तन गर्दै उनले पाँच पटक सांसद र पाँच पटक मन्त्रीको जिम्मेवारी सम्हालिसकेका छन् ।
यसपटक पनि उनी नवलपरासी बर्दघाट सुस्ता पश्चिम–१ बाट चुनावी मैदानमा छन् ।
कपिलवस्तुका बृजेशकुमार गुप्ता २०५६ सालदेखि संसदीय राजनीतिमा छन् ।
प्रतिनिधिसभा र संविधान सभामा पटक–पटक निर्वाचित भएका उनी यसपटक कपिलवस्तु–२ बाट प्रतिस्पर्धामा छन् ।
एमाले उपाध्यक्ष विष्णुप्रसाद पौडेल २०५१ सालदेखि निरन्तर संसदीय राजनीतिमा सक्रिय छन् ।
पाँच पटक सांसद र आठ पटक मन्त्री बनेका पौडेल रूपन्देही–२ बाट पुनः चुनाव लडिरहेका छन् ।
पूर्वप्रधानमन्त्री पुष्पकमल दाहाल ‘प्रचण्ड’ पनि पटक–पटक निर्वाचन क्षेत्र फेर्दै यसपटक रुकुम पूर्व पुगेका छन् ।
त्यस्तै, गोकर्ण विष्ट, सर्वेन्द्रनाथ शुक्ला, शंकर पोखरेल, वर्षमान पुन, मोहम्मद इस्तियाक राई र घनश्याम यादव अहिर जस्ता नेता दशकौँदेखि संसद र सरकारमा घुमिरहेकै छन् ।
गुल्मीमा चन्द्र भण्डारी र प्रदीप ज्ञवाली बीच पाँचौँ पटक प्रतिस्पर्धा हुँदैछ ।
विश्लेषकहरूका अनुसार लामो समयदेखि सत्तामा रहेका नेताहरूको प्रशासनिक पहुँच, विकास बजेटमा प्रभाव, कार्यकर्ता सञ्जाल र राजनीतिक नियुक्तिमा प्रभावका कारण उनीहरू पुनः शक्तिमा फर्किरहन्छन् ।
विश्लेषक रामचन्द्र श्रेष्ठ भन्छन्, ‘पार्टीभित्रै पुस्तान्तरण अवरुद्ध हुँदा एउटै अनुहार दोहोरिन्छ । युवालाई कार्यकर्तामै सीमित गर्ने प्रवृत्तिले नयाँ नेतृत्व विकास हुन सकेको छैन ।’
लुम्बिनीको यो चुनावी तस्वीरले पार्टीभन्दा व्यक्ति बलियो हुने र मतदाताले नयाँ विकल्पभन्दा चिनेकै अनुहार रोज्ने प्रवृत्ति अझै कायम रहेको संकेत गर्छ ।
