विश्व खबर 
काठमाडौं– जेन्जी आन्दोलनका क्रममा घाइते भएकाका लागि सरकारले ४८ लाख ५८ हजार रुपैयाँ भैपरी खर्चवापत् निकासा गरेको छ ।
स्वास्थ्य मन्त्रालयको प्रारम्भिक प्रतिवेदनका आधारमा प्रत्येक घाइतेलाई २० हजारका दरले यो रकम पठाइएको हो ।
पहिलो चरणमा झापा, मोरङ, सुनसरी, काठमाडौं, ललितपुर, कास्की, सुर्खेत, कैलाली र डडेलधुराका घाइतेहरूलाई रकम पठाइएको गृह मन्त्रालयले जनाएको छ ।
असोज १२ गतेको मन्त्रिपरिषद् निर्णयअनुसार प्राविधिक समितिले वर्गीकरण गरेपछि राहत वितरण गरिने छ ।
हालसम्म २ हजार ४२९ जना घाइतेको विवरण प्राप्त भएको छ भने २ हजार ८७६ परिचयपत्र जिल्लामा पठाइएको छ ।
घाइतेको पुनःउपचारका लागि ‘जेन–जी क्लिनिक’ सञ्चालनमा ल्याइएका छन् ।
सरकारले अहिलेसम्म एक अर्बभन्दा बढी रकम उपचारमा खर्च गरेको छ ।
प्रधानमन्त्री सुशीला कार्कीले उपचारमा कुनै कमी हुन नदिन निर्देशन दिएकी छिन् ।
त्यस्तै, आन्दोलनका क्रममा मृत्यु भएका ५३ जनाका परिवारलाई १५ लाखका दरले राहत पठाइएकोमा ४९ परिवारले बुझिसकेका छन् ।
सरकारले असोज १ गते राष्ट्रिय शोक मनाउँदै सार्वजनिक बिदा दिएको थियो ।
आन्दोलनका क्रममा ७६ जनाको मृत्यु भएको पुष्टि भएको छ ।
मृतकको स्थायी पहिचानका लागि प्रहरी र जिल्ला प्रशासनमार्फत विवरण संकलन भइरहेको छ ।
दमन र क्षतिको छानबिनका लागि पूर्वन्यायाधीश गौरीबहादुर कार्कीको नेतृत्वमा न्यायिक आयोग गठन गरिएको छ ।
प्रतिक्रिया दिनुहोस्