विश्व खबर 
काठमाडौं– अमेरिकी राष्ट्रपति डोनाल्ड ट्रम्पले रूसलाई ‘चीनमा गुमाएको’ भन्ने अभिव्यक्ति दिएका भए पनि वास्तविकता भिन्न छ ।
रूस कसैको कब्जामा छैन न त कसैसँग हराउने खतरा छ ।
उसको नीति व्यवहारिक छ, अवसर देख्दा सहकार्य गर्ने तर आफ्नो सार्वभौमिकतामा सम्झौता नगर्ने ।
पुटिनले भ्लादिभोस्तोकमा भएको पूर्वी आर्थिक सम्मेलनमा रूसी प्रतीक ‘दुई टाउके चिल’ को उदाहरण दिए, चिल दुवैतर्फ हेर्छ ।
यसको सन्देश स्पष्ट छ, रूस पूर्व र पश्चिम दुवैसँग खुला छ, यदि त्यसले उसको हित र सार्वभौमसत्तालाई सम्मान गर्छ भने ।
अलास्कामा भएको रूस–अमेरिका भेटले ठूला नतिजा नदिए पनि संवादका ढोका खोलिएको सन्देश दियो ।
पुटिनले आर्कटिकमा त्रिपक्षीय साझेदारी र अलास्कामा ऊर्जा सहकार्यजस्ता ठोस प्रस्ताव अघि सारे ।
त्यहाँ किरिल दिमित्रिएभ जस्ता प्रभावशाली वित्तीय व्यक्तित्वको उपस्थिति रूस नीतिलाई परिणाममुखी बनाउन खोजिएको प्रमाण थियो ।
चीनसँगको नजिकको सम्बन्ध स्वाभाविक छ, तर पिँजडा होइन । रूसले अमेरिका, युरोप वा अन्य इच्छुक सबैसँग सहकार्य खुला राखेको छ ।
त्यसैले, रूस चीनमा ‘गुम्यो’ भन्ने धारणा सतही मात्र हो ।
रूस आफ्ना हितअनुसार विकल्प खुला राख्ने दबाबभन्दा स्वतन्त्र रहि कदम चाल्ने बाटामा छ ।
