विश्व खबर 
काठमाडौं– अमेरिकाको नवौँ सर्किट अपिल अदालतले राष्ट्रपति डोनाल्ड ट्रम्प प्रशासनलाई नेपालसहित मध्य अमेरिकाबाट आएका झण्डै ६० हजार आप्रवासीको अस्थायी सुरक्षा स्थिति (टीपीएस) समाप्त गर्न अनुमति दिएको छ ।
यसअघि तल्लो अदालतले रोक लगाएको यो निर्णयपछि आप्रवासीलाई स्वदेश फर्काउने बाटो खुलेको हो ।
फैसला अनुसार नेपालका करिब सात हजार, होन्डुरसका ५२ हजार र निकारागुआका चार हजार आप्रवासी प्रभावित हुनेछन् ।
नेपालका लागि टीपीएस यसै वर्ष अगस्ट ५ मा सकिसकेको छ भने होन्डुरस र निकारागुआका लागि यो अवधि आउँदो सेप्टेम्बर ८ मा समाप्त हुँदै छ ।
टीपीएस भनेको प्राकृतिक विपत्ति, राजनीतिक अस्थिरता वा अन्य खतरनाक परिस्थितिका कारण असुरक्षित देशका नागरिकलाई अमेरिकी होमल्यान्ड सेक्युरिटी विभागले दिने अस्थायी कानुनी स्थिति हो, जसअन्तर्गत उनीहरूलाई बस्न र काम गर्न अनुमति हुन्छ ।
ट्रम्प प्रशासनले यो कार्यक्रम स्थायी बसोबास वा शरणको विकल्प बन्नु नहुने दाबी गर्दै विभिन्न देशका लाखौँ आप्रवासीको टीपीएस समाप्त गर्दै आएको छ ।
यसअघि भेनेजुएला, हैटी, युक्रेन, अफगानिस्तान र क्यामरुनलगायत देशका नागरिकको टीपीएस पनि हटाइएको थियो ।
नेपालका नागरिकलाई २०१५ को विनाशकारी भूकम्पपछि, होन्डुरस र निकारागुआका आप्रवासीलाई भने १९९८ को आँधी ‘मिच’पछि यो सुविधा दिइएको थियो ।
तर, ट्रम्प प्रशासनको यो कदमविरुद्ध आप्रवासी अधिकार समूहहरूले निरन्तर विरोध गर्दै आएका छन् ।
