विश्व खबर 
काठमाडौं– अफगानिस्तानमा भएको बस दुर्घटनामा ७३ जनाको ज्यान गएको छ ।
मृतकमध्ये १७ जना बालबालिका रहेको बीबीसीले स्थानीय अधिकारीलाई उद्धृत गर्दै जनाएको छ ।
दुर्घटनाग्रस्त बसमा प्रायः इरानबाट फिर्ता पठाइँदै गरेका अफगानी नागरिक सवार रहेका थिए ।
तालिबानको सूचना तथा संस्कृति विभागका निर्देशक अहमदुल्ला मुक्तकीका अनुसार काबुलतर्फ जाँदै गरेको बस ट्रक र मोटरसाइकलसँग ठोक्किँदा आगलागी भएको हो ।
बसमा रहेका सबै यात्रुको मृत्यु भएको र ठोक्किएका अन्य दुई सवारीसाधनका चालकसहित दुई जनाले पनि ज्यान गुमाएको जनाइएको छ ।
हालका महिनाहरूमा इरानले गृहयुद्धका कारण त्यहाँ शरण लिएर बसेका अफगानीहरूलाई स्वदेश फर्काउने कार्यलाई तीव्रता दिएको छ ।
सन् १९७० को दशकदेखि लाखौँ अफगानीहरू युद्ध र अस्थिरताका कारण इरान तथा पाकिस्तान पलायन गरेका थिए ।
विशेषगरी सन् १९७९ मा सोभियत संघको आक्रमणपछि र सन् २०२१ मा तालिबान पुनः सत्तामा आएपछि अफगानीहरूको विदेश पलायन अझ बढेको थियो ।
