images
images
  • कांग्रेस–माओवादीको प्रियपात्र रमेश शेर्पाविरुद्ध १ अर्बभन्दा बढी बिगोसहित ५ वर्ष कैदको मुद्दा दायर

    काठमाडौं– तातोपानी नाकामार्फत भेप (विद्युतीय चुरोट) चोरी पैठारी गरी अर्बौं राजस्व छली गरेको आरोपमा शिल्क ग्रुप प्रालिका अध्यक्ष रमेश शेर्पा सहित १२ जनाविरुद्ध जिल्ला अदालत ललितपुरमा मुद्दा दायर भएको छ ।

    राजश्व अनुसन्धान विभागले १ अर्ब ७४ करोड ६२ लाख ४७ हजार बिगो र कैद सजायको मागसहित मुद्दा हालेको हो ।

    विभागले २०८१ पुस २२ गते ललितपुर महालक्ष्मी–४ बाट ८६ हजार ४ सय थान भेप बरामद गरेको थियो ।

    त्यसपछि गरिएको छानबिनमा शिल्क ग्रुपले अन्य सामग्रीमा समेत ठूलो परिमाणमा राजस्व छलेको प्रमाण फेला परेको विभागका सूचना अधिकारी नवराज अधिकारीले जनाए ।

    अनुसन्धानका क्रममा शिल्कको बालकुमारी शाखा र नक्सालस्थित कर्पोरेट कार्यालयमा समेत छापा मारिएको थियो ।

    विभागका अनुसार रमेश शेर्पा र उनका भिनाजु विजय शेर्पा चोरी पैठारीमा मुख्य संलग्न छन् ।

    विजय तातोपानी नाकामै बसेर भन्सार, दलका नेता र पत्रकारसम्मलाई प्रभावमा पार्ने गरेको बताइन्छ ।

    यसमा सहयोगीको भूमिकामा रहेका गोदाम सञ्चालक महेशप्रसाद पाठक र कर्मचारी सन्तोष पराजुलीलाई आधा सजाय माग गरिएको छ ।

    रमेश शेर्पाको पृष्ठभूमि

    सिन्धुपाल्चोक बाह्रबिसे–६ का रमेश शेर्पा सामान्य व्यापारी परिवारका हुन् ।

    उनका पिता तातोपानी नाकामा मैदा, चामल, धूपजस्ता सामान व्यापार गर्थे ।

    रमेश भने काठमाडौंमा पढाइ पूरा गर्दै व्यवसायतर्फ लागेका थिए ।

    कोरोना लकडाउनका समयमा उनले स्थानीय प्रशासनलाई प्रभावमा पार्दै चीनबाट सुन भित्र्याएर ठूलो सम्पत्ति जोडेको निकट व्यापारीहरूको भनाइ छ ।

    त्यसपछि उनले चिनियाँ र भारतीय व्यापारीसँग प्रत्यक्ष सम्बन्ध कायम गरे ।

    विजय नाकामा ‘सेटिङ’ मिलाउने गर्थे भने रमेश काठमाडौंमै बसेर दलका नेता, कर्मचारी र प्रहरी प्रशासन र पत्रकारसँग सञ्जाल बनाउँथे ।

    थोरै समयमै उनले अरबपति बन्न सफल भए ।

    उनको सम्बन्ध कांग्रेस नेता मोहन बस्नेत र माओवादी अध्यक्ष प्रचण्डकी छोरी गंगा दाहालसँग नजिक रहेको बताइन्छ ।

    साथै, चीनबाट रासायनिक मल ढुवानीको ठेक्का समेत उनैले लिँदै आएका छन् ।

    प्रतिक्रिया दिनुहोस्
    images
    images