विश्व खबर 
काठमाडौं– अलास्कामा रुसी राष्ट्रपति भ्लादिमिर पुटिनसँग भेट गरेपछि अमेरिकी राष्ट्रपति डोनाल्ड ट्रम्पले युरोपेली नेताहरूसँग फोनवार्ता गरेका थिए ।
मिडिया रिपोर्टअनुसार ट्रम्पले यस वार्तामा युरोपेली नेताहरूलाई अगस्ट २२ भित्र पुटिन र युक्रेनी राष्ट्रपति भोलोदिमिर जेलेन्स्कीसँग त्रिपक्षीय शिखर सम्मेलन आयोजना गर्ने आफ्नो इच्छा व्यक्त गरेका थिए ।
पुटिनसँगको भेटपछि ट्रम्पले युक्रेनी राष्ट्रपति जेलेन्स्कीसँग पनि संवाद गरेका थिए ।
वार्तापछि दुई नेता सोमबार वाशिङ्टनमा भेट हुनेमा सहमत भएका छन् ।
जेलेन्स्कीले आफ्नो सामाजिक सञ्जालमार्फत अमेरिकी राष्ट्रपति ट्रम्पसँगको भेटघाट पुष्टि गरेका छन् ।
अमेरिकी अनलाइन मिडिया आउटलेट एक्सियोसका अनुसार ट्रम्पले सोमबार ह्वाइट हाउसमा हुने बैठकमा युरोपेली नेताहरूलाई पनि उपस्थित हुन आमन्त्रित गरेका छन् ।
जर्मन चान्सलर फ्रेडरिक मेर्जले शनिबार भनेका छन् कि जेलेन्स्की र ट्रम्पबीचको भेटपछि त्रिपक्षीय शिखर सम्मेलन हुने अपेक्षा गरिएको छ ।
रुसबाट हालसम्म बैठकमा सहभागी हुने वा यसको बारेमा कुनै आधिकारिक प्रतिक्रिया आएको छैन ।
पुटिनसँगको भेटपछि ट्रम्पले युरोपेली नेताहरूसँगको संवादमा शान्ति सम्झौताको प्रस्ताव प्रस्तुत गरेका थिए ।
अमेरिकी मिडिया रिपोर्टमा उद्धृत गर्दै रुसी समाचार एजेन्सी तासले लेखेको छ कि यस प्रस्ताव अनुसार युक्रेनले डोनबास क्षेत्र रुसलाई हस्तान्तरण गर्नेछ ।
यसको बदलामा युक्रेन र युरोप दुवैलाई सुरक्षा ग्यारेन्टी प्रदान गरिने छ ।
अगस्ट १५ मा अलास्कामा भएको ट्रम्प–पुटिन भेटवार्ता करिब तीन घण्टा लामो थियो ।
भेटपछि ट्रम्पले शिखर सम्मेलनलाई निकै उपयोगी रहेको बताए ।
