विश्व खबर 
काठमाडौं– २०१८ मा फिनल्यान्डको हेलसिंकीमा भएको भेटपछि डोनाल्ड ट्रम्पले संयुक्त पत्रकार सम्मेलनमा २०१६ को अमेरिकी चुनावमा रुसी हस्तक्षेपबारे अमेरिकी गुप्तचर निकायको निष्कर्षलाई खारेज गर्दै पुटिनको पक्ष लिएका थिए ।
उक्त क्षणमा ट्रम्पकी रुस मामिला सल्लाहकार फियोना हिल यति आत्तिएकी थिइन् कि बेहोस भएको नाटक गरेर कार्यक्रम रोक्ने सोचसम्म पुगेकी थिइन् ।
सात वर्षपछि ट्रम्प र पुटिन फेरि भेट्न लागेका छन् ।
यो भेट अलास्काको एंकोरेजस्थित ज्वाइन्ट बेस एल्मेनडोर्फ–रिचर्डसनमा शुक्रबार हुने बताइएको छ ।
तर, बैठकमा ट्रम्पको साथमा रुस विज्ञ कोही नहुने भन्दै पश्चिमा विश्लेषकहरूले चिन्ता व्यक्त गरेका छन् ।
दोस्रो कार्यकालमा ट्रम्पले नियुक्तिमा विज्ञताको सट्टा बफादारीलाई प्राथमिकता दिएका छन् ।
रुस वार्ताको जिम्मा रियल स्टेट व्यवसायी स्टिभ विट्कोफलाई दिइएको छ, जो विदेश मामिलामा नयाँ हुन् ।
पूर्व अमेरिकी राजदूत एरिक रुबिनका अनुसार ट्रम्पको टोलीमा रुस–युक्रेन बुझ्ने एक जना पनि छैनन् ।
२५ वर्षदेखि सत्तामा रहेका पुटिनलाई विषयवस्तुमा बलियो पकड राख्ने र वार्तामा विपक्षीलाई कमजोर देखाउने नेताका रूपमा चिनिन्छ ।
उनका पूर्व प्रतिद्वन्द्वीहरूले उनी छलकपट र वार्ताको एजेन्डा आफ्नो पक्षमा मोड्न सिपालु रहेको बताएका छन् ।
यसपटक अमेरिकी राष्ट्रिय सुरक्षा परिषद र विदेश मन्त्रालय दुवैमा जनशक्ति कटौती भएको छ ।
रुस–युक्रेन मामिला हेर्ने धेरै पद खाली छन् ।
ट्रम्पले व्यक्तिगत सम्बन्ध र सहज ज्ञानका आधारमा कूटनीति गर्ने दाबी गर्दै आएका छन् ।
तर, उनका पूर्व सुरक्षा सल्लाहकार जोन बोल्टनका अनुसार ट्रम्प प्रायः तयारी नगरी वार्तामा सहभागी हुन्छन्, जस्तै २०१८ मा पुटिनसँगको भेटअघि ब्रिफिङ गर्न खोज्दा उनी फुटबल हेर्दै थिए । –एजेन्सी
