विश्व खबर 
काठमाडौं । देशका केही भूभागमा आज हिमपातको सम्भावना रहेको छ । पश्चिमी वायुको सामान्य प्रभाव रहँदा केही स्थानमा हिमपात हुने भएको हो ।
जल तथा मौसम विज्ञान विभागका अनुसार बिहान कोसी र गण्डकी प्रदेशको पहाडी भूभागमा आंशिक बदली छ । बाँकी भूभागमा मौसम मुख्यतया सफा छ ।
तराईका धेरै स्थानमा हुस्सु र कुहिरो लागेको छ । बिहान हुस्सु र कुहिरो लागे पनि दिउँसोसम्म खुल्ने मौसमविद् रोजन लामिछाने बताउँछन् ।
उनका अनुसार बिहान पौने ६ बजे दिपायल र विराटनगरमा समान १०० मिटर भिजिविलिटी छ । भैरहवामा २००, नेपालगञ्जमा एक हजार २०० मिटर भिजिविलिटी छ ।
धनगढीमा दुई हजार र काठमाडौंमा पाँच हजार मिटर भिजिविलिटी छ । “जाडो याम बाँकी रहेकाले तराईमा अझै केही दिन बिहानको समयमा हुस्सु र कुहिरो लाग्नेछ,” मौसमविद् लामिछानेले भने ।
तराई क्षेत्रका अधिकांश विमानस्थलमा बिहान हवाई सेवा प्रभावित हुने सम्भावना छ । दुई हजार मिटरभन्दा कम भिजिविलिटीमा विमान उडान र अवतरणमा समस्या हुन्छ ।
दिउँसो कोसी, वाग्मती, गण्डकी र कर्णाली प्रदेशको पहाडी भूभागमा आंशिक बदली रहनेछ । बाँकी भूभागमा मौसम मुख्यतया सफा रहनेछ ।
कोसी र गण्डकी प्रदेशको उच्च पहाडी तथा हिमाली भूभागको एकदुई स्थानमा हल्का हिमपातको सम्भावना मौसमविद् लामिछानेले जानकारी दिए ।
राति कोसी, गण्डकी र कर्णाली प्रदेशको पहाडी भूभागमा आंशिक बदली रहनेछ । बाँकी भूभागमा मौसम मुख्यतया सफा रहनेछ ।
काठमाडौं उपत्यकामा बिहान केही बदली भए पनि दिउँसो सामान्यतया मौसम सफा रहनेछ । बिहान पौने ६ बजेको काठमाडौंको न्यूनतम तापक्रम ८ डिग्री सेल्सियस रहेको छ । दिउँसो बढेर १९ देखि २१ डिग्री सेल्सियससम्म पुग्ने मौसमविद् लामिछानेले जानकारी दिए ।
हिजोभन्दा आज काठमाडौंको तापक्रम केही घटेको छ । हिजो बिहान पौने ६ बजे काठमाडौंको न्यूनतम तापक्रम ८.५ डिग्री सेल्सियस रहेको थियो ।
हिमाली भूभागमा हिमपात र तराई तथा उपत्यकाका धेरै स्थानमा हुस्सु र कुहिरो लागेकाले दैनिक जनजीवन, कृषि, स्वास्थ्य, यातायात सेवामा असर पर्नसक्ने हुनाले आवश्यक सतर्कता अपनाउन विभागको आग्रह छ ।
