विश्व खबर 
माथि–माथि शैलुङेमा चौरी डुलाउनेलाई,
हत्कैमा मायाको गुँरास फुलाउनेलाई ।।
गायिका कुन्ती मोक्तानले करिव २ दर्शक पहिला गाएको यो गितले शैलुङ जाने जो कोहिले गुनगुनाउने गरन्छ । यो गीत नसुन्ने सायक कमै होलान । रामेछाप र दोलखाको सीमावर्ती भु भाग हो, शैलुङ । समुन्द्री सतहबाट ३ हजार १ सय मिटर अग्लाईमा रहेको शैलुङ महाभारत रेन्जको सबैभन्दा उचाइमा रहेका स्थलमध्ये एक हो ।
प्रकृति र अध्यात्मको दोभान हो–शैलुङ। धर्तिकै स्वर्ग शैलुङमा पुग्दा तन र मनमा ऊर्जा भरिन्छ। ३१५० मिटर उचाईको डाँडामा सूर्योदय, सूर्यास्त र हिमाली सौन्दर्यको मिठास पाइन्छ। दोलखाको शैलुङ गाउँपालिका र रामेछापको दोरम्बा गाउँपालिकामा पर्छ शैलुङ। यहाँबाट २२० डिग्रीमा हिमाली शृंखला देखिन्छ।
हिमालपनि कति हुन् कति, पश्चिमको अन्नपूर्ण, मनास्लु, लमजुङदेखि गणेश हिमाल, लाङटाङ, गौरीशंकर, सगरमाथा र नुम्बुरसम्म दर्जनौं हिमालहरू। एक टकले हेरिरहुँ जस्तो, क्यामेराले खिचिरहुँ जस्ता, तामाङ भाषाको शब्द ‘शैलुङ’ को नेपाली अर्थ हुन्छ–सय थुम्का। धानको थुप्रो जस्ता थुम्काहरू छन् यहाँ। कुनै अग्ला त कुनै होचा। जुन थुम्कामा चढेर हेरे पनि सेताम्मे हिमाल देखिन्छन्।
त्यसैले शैलुङ आफैंमा एउटा प्राकृतिक एसियाकै ठुलो भ्यू टावर हो। डाँडामा आन्तरिक पर्यटकको चहलपहल हुन्छ। सूर्योदयसँगै हिमालको लर्कन हेर्न पाउँदा पर्यटक रमाउँछन्। जैविक विविधताका हिसाबले हेर्दा वनजंगल, जडीबुटी, जंगली जनाबर र चराचुरुङीको भण्डारै हो शैलुङ। शैंलुङ प्रकृतिको सुन्दर सृजनामात्रै होइन, हिन्दू र बौद्धमार्गीको साझा तिर्थस्थलपनि हो। डाँडामा गुरु पद्मसंभवका पाइला, माने र चैत्य छन्। त्यस्तै शैलुङेश्वर महादेव र गोदावरी गुफापनि छ। यहाँ जनैपूर्णिमा ठूलो मेला लाग्छ।
यो क्षेत्र तामाङ, शेर्पा, नेवार, मगर, थामी, क्षेत्रीलगायत जातजातिको सुन्दर फूलबारी हो। सबै आपसमा मिलेर बसेका छन्।
दोलखाकै कालिन्चोक चम्केको धेरै वर्ष भएको छैन। अब चम्कने पालो शैलुङको। प्रायः हिउँ, बसन्त रितु गुराँस, ग्रिष्म र वर्षामा हरियाली र शरद र हेमन्त ऋतुमा हिमालको सौन्दर्य र हिउँ पर्छ शैलुङ।
पर्यटकको स्वागतमा मुस्कुराउँछ शैलुङ। खाना र बासका लागि खोलाखर्कमा सामान्य होटल छन्। क्याम्प फायरका नाउँमा राती अबेलासम्म बाहिर नबसौं, यसले स्वास्थ्य र अध्यात्मिक वातावरणमा असर पु¥याउँछ। यो मनोहारी ठाउँ घुमेर फर्कंदा मिठो अनुभूतिसँगै परिवार, इष्टमित्र र साथीसंगीका लागि चौंरीको घ्यु, छुर्पी, सकुटी, आलु, किवी, च्याउलगायत कोसेली ल्याउन पाइन्छ ।
कसरी जाने हो शैलुङ ?
शैलुङ बेस क्याम्प खोलाखर्कसम्म मोटरबाइक, जिप वा बसमा जान सकिन्छ। काठमाडौंबाट नेपालथोकहुँदै १२१ किलोमिटर दूरीमा छ खोलाखर्क। त्यसैगरि अर्को रूटमा काठमाडौंबाट सिन्धुपाल्चोकको मुढेहुँदै खोलाखर्क १३२ किमि दूरीमा पर्छ।
