विश्व खबर 
काठमाडौं । मोफसलको झापा फुटबल क्लब सहिद स्मारक ‘सी’ डिभिजन लिगको एक खेल अगावै ‘बी’ डिभिजन लिगमा बढुवा भएको छ ।
सोमबार सातदोबाटो स्थित एन्फा कम्प्लेक्समा भएको १२औं चरणको खेलमा विरगंज युथ एकेडेमीलाई ५(० ले पराजित गर्दै झापाले एक खेल अगावै ‘बी’ डिभिजन लिगमा आफ्नो स्थान पक्का गरेको हो ।
झापालाई जित दिलाउन पुजन राईले चार गोल गर्दा अर्को एक गोल सन्तोष लावतीले गरे ।
यस्तै, आजको हारसँगै वीरगञ्ज युथ भने ‘सी’ डिभिजन लिग छनोटमा घटुवा भएको छ ।
जितसँगै शीर्ष स्थानमा उक्लिएको झापाले ३१ अंक जोडेको छ । जुन दोस्रो स्थानको प्लानिङ ब्वाइज युनाइटेड क्लबको भन्दा तीन अंक बढी हो । यस्तै, तेस्रो स्थानको आरसी ३२ फुटबल एकेडेमीको पनि २८ अंक छ । वीरगन्जको १२ खेलबाट ५ अंक छ ।
झापाले लिगमा आरसी ३२ लाई हराएको र प्लानिङ ब्वाइजसँग बराबरी गरेको कारण एक खेल अगावै दोस्रो डिभिजनको टिकट काटेको हो ।
झापाले अन्तिम खेलमा स्वयम्भू क्लबसँग खेल्नेछ । यस्तै, प्लानिङ ब्वाइजले ओसिस क्लब र आरसी ३२ ले स्पोर्टस एकेडेमी साँगासँग खेल्नेछ ।
आजै भएको पहिलो खेलमा प्लानिङ ब्वाइजले समाज कल्याण खेलकुद केन्द्रलाई ४(० ले पराजित गरेको थियो ।
आजको खेलसँगै सी डिभिजन लिगबाट घटुवामा पर्ने दुई टोलीको टुङ्गो लागेको छ । तालिकाको पुछारमा रहेको ओसिस क्लब यसअघि नै घटुवामा परिसकेको छ ।
अब, प्लानिङ ब्वाईज क्लब र आरसी ३२ मध्य एक दोस्रो डिभिजनमा बढुवा हुनेछन् ।
