images
images
  • ट्रम्पसँग जापानी प्रधानमन्त्रीको भेटवार्ता

    काठमाडौं– अमेरिकी राष्ट्रपति डोनाल्ड ट्रम्पले चिनियाँ र रुसी राष्ट्रपतिसँग त्रिपक्षीय शिखर सम्मेलन गर्ने तयारी गरिरहेका बेला जापानी प्रधानमन्त्री साने ताकाइचीले उहाँसँग भेटवार्ता गरेका छन् ।

    जापानको विदेश मन्त्रालयका अनुसार दुवै नेताबीच मङ्गलबार फिलिपिन्सको मनिलामा आयोजित रात्रिभोजका क्रममा कुराकानी भएको हो ।

    फिलिपिन्सका राष्ट्रपति फर्डिनान्ड मार्कोसले आयोजना गर्नुभएको रात्रिभोजमा भएको भेटमा दुवै नेताले इन्डो–प्यासिफिक क्षेत्रका विषयमा निकट सहकार्य गर्ने प्रतिबद्धता व्यक्त गर्नुभएको जापानी विदेश मन्त्रालयका एक अधिकारीले बताएका छन् ।

    प्रधानमन्त्री ताकाइची बुधबार एसिया–प्रशान्त आर्थिक सहयोग (एपेक) शिखर सम्मेलनमा सहभागी हुन चीनको सेन्जेन जाँदै छन् ।

    प्रधानमन्त्री बनेपछि उनको यो पहिलो चीन भ्रमण हो ।

    ताइवानसम्बन्धी उनको अभिव्यक्तिपछि चीनसँगको पछिल्लो परिस्थितिका कारण चिनियाँ राष्ट्रपति सी जिनपिङसँग औपचारिक भेटवार्ता हुनेबारे भने अन्योल रहेको बताइएको छ ।

    यद्यपि, सञ्चारमाध्यमका अनुसार उनले रूसी राष्ट्रपति भ्लादिमिर पुटिनसँग छोटो भेट गर्न सक्ने सम्भावना छ ।

    रूसी विदेश मन्त्रालयका एक अधिकारीले भने त्यस्तो भेटबारे कुनै निर्णय नभएको बताएका छन् ।

    जासुसीको आरोपमा रूसमा एक जापानी पत्रकार पक्राउ पर्नुका साथै जापान टोबाकोसँग सम्बन्धित सम्पत्ति जफत भएपछि पछिल्ला साताहरूमा जापान–रूस सम्बन्धमा तनाव बढेको छ ।

    यसैबीच, सी, ट्रम्प र पुटिनबीच बिहीबार त्रिपक्षीय शिखर सम्मेलन हुने कार्यक्रम छ ।

    जापानी सरकारका मुख्य प्रवक्ता मिनोरु किहाराले अमेरिका–चीन, चीन–रूस तथा अमेरिका–चीन–रूस सम्बन्धलाई जापानले नजिकबाट नियालिरहेको बताएका छन् ।

    उनले जापानको राष्ट्रिय हित र अन्तर्राष्ट्रिय शान्ति तथा स्थिरताका लागि अमेरिका–जापान गठबन्धन बलियो हुनु आवश्यक रहेको उल्लेख गरे ।

    चीनले आफ्नो भू–भाग मान्दै आएको ताइवानको अवस्थाबारे प्रधानमन्त्री ताकाइचीले गत वर्ष नोभेम्बरमा जापानको सम्भावित भूमिकाबारे धारणा व्यक्त गरेका थिए ।

    उक्त अभिव्यक्तिपछि चीनले आफ्नो चासो व्यक्त गरेको थियो ।

    प्रतिक्रिया दिनुहोस्
    images
    images