विश्व खबर 
काठमाडौं – राष्ट्रपति रामचन्द्र पौडेलले तिहारले नेपाली समाजमा आपसी सद्भाव, सहिष्णुता, भ्रातृत्व र समृद्धिको भावना अभिवृद्धि गर्ने विश्वास व्यक्त गर्नुभएको छ । तिहार पर्व २०८३ का अवसरमा शुभकामना सन्देश जारी गर्दै उनले सांस्कृतिक, पौराणिक तथा वैज्ञानिक महत्व बोकेको तिहार उज्यालो र प्रकाशको पर्व भएको बताएको छ। यस पर्वले विभिन्न जातजाति, भाषाभाषी र संस्कृतिलाई एकताको सूत्रमा बाँध्ने काम गरेको उनको भनाइ छ ।
राष्ट्रपति पौडेलले तिहारलाई नेपालको मौलिक संस्कृति संरक्षण गर्ने महत्वपूर्ण पर्वका रूपमा उल्लेख गर्नुभएको छ। भाइटीका र म्हपूजाले प्रेम, स्नेह, सामाजिक एकता र समृद्धिको सन्देश दिने उल्लेख गर्दै उहाँले तिहारका सांस्कृतिक अभ्यासले धर्म, दया, करुणा तथा अन्धकारमाथि प्रकाशको विजयको भावना अभिव्यक्त गर्ने बताएको छ ।
शुभकामना सन्देशमा काग, कुकुर, गाई, गोरु र गोवर्द्धन पर्वतको पूजा तथा सम्मान गर्ने परम्पराले मानव र प्रकृतिबीचको अन्योन्याश्रित सम्बन्धलाई उजागर गर्ने उल्लेख छ । लक्ष्मीपूजामा धनधान्यकी देवी लक्ष्मीको आराधना गर्ने तथा भाइटीकामा दाजुभाइ र दिदीबहिनीबीच टीका लगाएर पर्व मनाउने चलनले पारिवारिक प्रेम र आत्मीयता बढाउने राष्ट्रपति पौडेलको भनाइ छ ।
उहाँले तिहारमा दियो बाल्ने, मिठा परिकार खाने र देउसी–भैलो खेल्ने परम्पराले सामाजिक भाइचारा र सद्भावलाई प्रगाढ बनाउने बताउनुभएको छ । यस पर्वले परिवार, प्रकृति, पशुपन्छी तथा देवताप्रतिको सम्मान र प्रेमसमेत अभिव्यक्त गर्ने उहाँको सन्देशमा उल्लेख छ ।
राष्ट्रपति पौडेलले तिहारका सांस्कृतिक अभ्यासले सबैको जीवनमा प्रकाश छर्दै सत्य, न्याय र सामाजिक सुशासनको मार्गमा अघि बढ्न प्रेरणा प्रदान गरोस् भन्ने कामना गरेको छ ।
तिहारले सम्पूर्ण नेपालीबीच आपसी सद्भाव, सहिष्णुता, भ्रातृत्व, सुशासन र समृद्धिको भावना अझ बलियो बनाउन प्रेरित गर्ने विश्वास व्यक्त गर्दै उहाँले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति, समृद्धि र उत्तरोत्तर प्रगतिको शुभकामना दिएको छ ।
