विश्व खबर 
काठमाडौं- जारी रुस-युक्रेन युद्धको शान्तिपूर्ण निकासको लागि अमेरिका सम्मिलित त्रिपक्षीय वार्ता हुने भएको छ । रुसी राष्ट्रपति भ्लादिमिर पुटिन सहमत भएसँगै युक्रेन र अमेरिकासँग त्रिपक्षीय शान्ति वार्ता हुने निश्चित जस्तै देखिएको हो ।
अमेरिकी राष्ट्रपति डोनाल्ड ट्रम्पका विशेष दूत स्टिभ विटकफसँग बुधबार रुसको सेन्ट पिटर्सबर्गमा भएको भेटपछि पुटिन वार्ताका लागि सहमत भएको बताइएको छ ।
अमेरिकी राष्ट्रपति ट्रम्प र रुसी राष्ट्रपति पुटिनबीच युक्रेन युद्ध अन्त्य गर्ने विषयमा कूटनीतिक छलफल भइरहेका बेला त्रिपक्षीय वार्ताको तयारी अघि बढ्ने भएको हो ।
अन्तर्राष्ट्रिय समाचार संस्था रोयटर्सका अनुसार पुटिनका विदेश मामिला सल्लाहकार युरी उशाकोभले वार्ता नोभेम्बर १० पछि हुनसक्ने बताएका छन् । अबुधाबीमा वार्ता हुनसक्ने सम्भावना रहेको उनले बताए । यद्यपि वार्ताको मिति र विस्तृत कार्यतालिका निश्चित भइसकेको छैन ।
सीएनएनको विश्लेषणअनुसार ट्रम्पले रुससँगको सहमतिलाई युद्ध अन्त्य गर्ने अवसरका रूपमा हेरेका छन् भने पुटिनले अमेरिकासँगको वार्ताबाट रुसको रणनीतिक हित अघि बढाउन खोजिरहेका छन् । रुसमाथिका प्रतिबन्ध, ऊर्जा व्यापार र युक्रेनको भूभागसम्बन्धी विवाद वार्ताका महत्त्वपूर्ण पक्ष हुनेछन् ।
रोयटर्सका अनुसार पुटिन र विटकफबीचको भेटमा युक्रेन युद्ध अन्त्य गर्ने सम्भावित उपायबारे छलफल भएको थियो । तर युद्ध अन्त्य गर्ने सर्तमा रुस र युक्रेनबीच अझै मतभेद छन् ।
रुसले पूर्वी युक्रेनको दोनेत्स्क क्षेत्रमाथि पूर्ण नियन्त्रणको माग गर्दै आएको छ । युक्रेनले भने आफ्नो भूभाग त्याग्ने विषयमा असहमति जनाउँदै आएको छ । युक्रेनको सुरक्षा प्रत्याभूति र भविष्यमा उत्तर एट्लान्टिक सन्धि संगठन (नेटो) मा आबद्ध हुन पाउने विषय पनि विवादका प्रमुख मुद्दा हुन् ।
अमेरिकी राष्ट्रपति ट्रम्पले युक्रेन युद्ध अन्त्य गर्न कूटनीतिक प्रयास तीव्र पारिरहेका छन् । तर त्रिपक्षीय वार्ताका लागि सहमति हुनु र युद्ध अन्त्य गर्ने सम्झौता हुनु फरक विषय हुन् । वार्ता अघि बढे पनि त्यसले युद्ध अन्त्य गर्ने ठोस सहमतिको रूप लिन्छ कि लिँदैन भन्ने स्पष्ट भइसकेको छैन ।
रुस र युक्रेनबीच जारी युद्ध सन् २०२२ फेब्रुअरी २४ मा रुसले युक्रेनमाथि पूर्णस्तरको सैन्य आक्रमण सुरु गरेपछि चर्किएको थियो । यद्यपि दुई देशबीचको द्वन्द्व सन् २०१४ मै सुरु भएको थियो । त्यतिबेला रुसले युक्रेनको क्राइमिया प्रायद्वीप कब्जा गरेको थियो भने पूर्वी युक्रेनको डोनबास क्षेत्रमा रुसी समर्थित सशस्त्र समूह र युक्रेनी सेनाबीच लडाइँ सुरु भएको थियो ।
