काठमाडौं । आर्टिफिसियल इन्टेलिजेन्स (एआई) विस्तारमा भइरहेको भारी खर्च र सोबाट प्राप्त हुने लाभबारे लगानीकर्ताहरूले लेखाजोखा गरिरहँदा सामाजिक सञ्जाल फेसबुकको मातृ कम्पनी मेटा प्लेटफर्म्सको शेयर मूल्य बिहीबारको प्रि-मार्केट कारोबारमा करिब ३ प्रतिशतले घटेको छ । यस वर्ष कम्पनीको शेयर मूल्य ५ प्रतिशतभन्दा बढीले बढेको भए पनि हालको गिरावट कायमै रहेमा मेटाको बजार पूँजीकरणबाट करिब ५० अर्ब अमेरिकी डलर घट्ने अनुमान गरिएको छ ।
तेस्रो त्रैमासिकमा कम्पनीले अपेक्षाभन्दा राम्रो आम्दानी गर्नुका साथै चौथो त्रैमासिकको बिक्री अनुमान पनि वाल स्ट्रिटको प्रक्षेपणभन्दा माथि रहने जनाएको छ । यसका साथै मेटाले आफ्नो नयाँ एआई एजेन्ट एप ‘म्युज’ प्रयोगकर्ताहरूले तीव्र रूपमा अपनाइरहेको विषयलाई समेत उजागर गरेको छ ।
यद्यपि, वित्तीय नतिजा सार्वजनिक हुनुभन्दा केही घण्टाअघि न्यु मेक्सिकोका एक न्यायाधीशले क्याम्ब्रिज एनालिटिका डेटा-गोपनीयता मामिलामा मेटालाई २५ अर्ब डलरको जरिवाना तिराउने आदेश दिएका छन् । मेटाले उक्त फैसलाविरुद्ध पुनरावेदन गर्ने योजना बनाएको जनाएको छ ।
आफ्नो एआई योजनालाई सघाउन इन्स्टाग्रामको मातृ कम्पनी मेटाले वार्षिक पुँजीगत खर्च १३५ अर्ब देखि १४५ अर्ब अमेरिकी डलरसम्म पुग्ने अनुमान गरेको छ । अघिल्लो वर्ष सोही अवधिमा नगद प्रवाह धनात्मक रहेकोमा यस वर्षको तेस्रो त्रैमासिकमा कम्पनीले २.१२ अर्ब डलरको नगद प्रवाह घाटा बेहोरेको छ ।
अर्कोतर्फ, डोयचे बैंकका विश्लेषक बेन्जामिन ब्ल्याकका अनुसार मेटाको एआई लगानीले विज्ञापनको कार्यसम्पादन र प्रयोगकर्ताको संलग्नता बढाएको छ, जसले गर्दा लगानीकर्ताहरूले कम्प्युटिङ पूर्वाधारलाई लागतको भारको रूपमा नभई राजस्व सिर्जना गर्ने सम्पत्तिका रूपमा हेर्न थालेका छन् ।
यसैबीच, मेटाले गैर-मतदान अधिकार रहने क्लास ‘सी’ शेयर जारी गर्ने योजनाको घोषणा गरेको छ, जसले सीइओ मार्क जुकरबर्गको मताधिकार नियन्त्रण सुरक्षित राख्दै कम्पनीलाई अधिग्रहण र कर्मचारी क्षतिपूर्तिमा थप लचकता प्रदान गर्नेछ । एलएसइजीले सङ्कलन गरेको तथ्याङ्क अनुसार वित्तीय नतिजा सार्वजनिक भएपछि कम्तीमा १३ वटा ब्रोकरेजहरूले मेटाको शेयरको मूल्य लक्ष्य बढाएका छन् ।
