विश्व खबर 
काठमाडौं- स्टेट बैंक अफ इन्डिया (एसबीआई) का ३ हजार ८९७ ग्राहकको व्यक्तिगत जानकारी डार्क वेबमा सार्वजनिक भएको खुलासा भएको छ ।
प्रारम्भिक अनुसन्धानमा डार्क वेबमा उपलब्ध लगभग ३.७५ लाख रेकर्डको जाँच गरिएको थियो । जसमध्ये ३ हजार ८९७ ग्राहकका रेकर्डमा उनीहरूको व्यक्तिगत विवरण भेटिएको खबरमा जनाइएको छ ।
बैंकका अनुसार लीक भएको डेटामा ग्राहकको दर्ता गरिएको मोबाइल नम्बर, जन्म मिति, नाम, लिङ्ग, इमेल आईडी, घरको ठेगाना, बैंक शाखा र सीआईएफ नम्बर समावेश छन् ।
साथै लीड आईडी, कर्जा तथा लीडसँग सम्बन्धित रेकर्डको जानकारी र अन्य केही फाइलहरू पनि यसमा परेको जनाइएको छ ।
बैंकले घटनाको गम्भीरतालाई ध्यानमा राख्दै एक स्वतन्त्र साइबर सुरक्षा एजेन्सीलाई अनुसन्धानको जिम्मेवारी सुम्पेको छ । यो एजेन्सीले डेटा लीकको प्रकृति र यसको दायराको विस्तृत मूल्याङ्कन गर्ने बताइएको छ, जसले घटनासँग जोडिएका सबै पक्षहरूको पत्ता लगाउन सकियोस् ।
एसबीआईले बीएसई र एनएसईलाई लेखेको पत्रमा भनिएको छ, ‘हामी जानकारी गराउन चाहन्छौं कि यस घटनाले बैंकको मुख्य कामकारबाही, वित्तीय कार्यसम्पादन वा व्यवसाय निरन्तर सञ्चालन गर्ने क्षमतामा कुनै ठूलो असर पारेको छैन । बैंकका मुख्य कामहरू विनाकुनै बाधाव्यवधान सामान्य रूपमा चलिरहेका छन् । यस मामिलाको विस्तृत अनुसन्धान अझै जारी छ र आवश्यकअनुसार सुधार तथा भविष्यमा यस्ता घटनाहरू दोहोरिन नदिन उचित कदमहरू चालिँदैछ ।’
बैंकले यस स्थितिमाथि निरन्तर निगरानी राखिरहेको र लागू नियमहरूअनुसार सबै आवश्यक कदम चालिरहेको बताएको छ ।
