विश्व खबर 
काठमाडौं– नेपाली कांग्रेसको १५औँ महाधिवेशनमा विशेष महाधिवेशन पक्षधर नेताहरूले पदाधिकारीको प्रारम्भिक मतगणनामा अग्रता लिएका छन्। सभापतिमा गगन थापा ९४ प्रतिशत मतसहित विजयी भइसकेका छन् भने अन्य पदाधिकारीको नतिजा आउने क्रम जारी छ।
उपसभापतिमा चन्द्रकान्त भण्डारीले अग्रता लिएका छन्। दोस्रो स्थानमा मधु आचार्य छन्। समावेशी उपसभापतिमा विशेष महाधिवेशनमा साथ दिएका विनोद चौधरी अगाडि छन् भने जीवन परियारले उनलाई पछ्याइरहेका छन्।
महामन्त्रीमा विशेष महाधिवेशनबाट महामन्त्री बनेका प्रदीप पौडेल अग्रस्थानमा छन्। दोस्रो स्थानमा उदयशमशेर राणा र तेस्रोमा सुनील शर्मा छन्। महिला महामन्त्रीमा डा. डिला संग्रौला र महालक्ष्मी उपाध्याय (डिना)बीच प्रतिस्पर्धा भइरहेको छ।
वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसाल निर्विरोध निर्वाचित भएका छन्। केही पदमा विशेष महाधिवेशनको विपक्षमा रहेका तथा पछि पार्टीको मूलधारमा जोडिएका नेताहरूले पनि प्रतिस्पर्धात्मक मत पाइरहेका छन्।
विशेष महाधिवेशनका लागि ४७ प्रतिशत प्रतिनिधिले हस्ताक्षर गरेका थिए। प्रारम्भिक मतपरिणामले विशेष महाधिवेशन पक्षधर नेताहरूप्रति प्रतिनिधिको समर्थन देखाए पनि अन्तिम नतिजाले मात्र पदाधिकारीको वास्तविक अवस्था स्पष्ट पार्नेछ।
केन्द्रीय निर्वाचन समितिका अनुसार उपसभापति र महामन्त्रीको मतगणना अन्तिम चरणमा पुगेको छ। सहमहामन्त्री र केन्द्रीय सदस्यको मतगणना जारी रहेकाले पूर्ण परिणाम आउन अझै केही दिन लाग्नेछ।
