विश्व खबर 
काठमाडौं- विद्युत् प्रणाली सुदृढीकरण तथा मर्मतसम्भारका लागि नेपाल विद्युत् प्राधिकरणले शनिबार र आइतबार काठमाडौँका विभिन्न क्षेत्रमा विद्युत् आपूर्ति बन्द गर्ने भएको छ ।
प्राधिकरणका अनुसार शनिबार गैह्रीधारा फिडरअन्तर्गत लैनचौर, उत्तरढोका, गैह्रीधारा, बालुवाटार, चाइनिज एम्बेसीलगायत क्षेत्रमा बिहान १० बजेदेखि दिउँसो ३ बजेसम्म बत्ती जानेछ ।
त्यस्तै, हाँडीगाउँ फिडरअन्तर्गत हाँडीगाउँ, नक्साल भाटभटेनी, टङ्गाल, गहनापोखरी, ज्ञानेश्वर तथा आसपासका क्षेत्रमा मध्याह्न १२ बजेदेखि दिउँसो ३ बजेसम्म विद्युत् आपूर्ति अवरुद्ध हुनेछ ।
आइतबार कालिकास्थान फिडरअन्तर्गत डिल्लीबजार, घट्टेकुलो, मैतीदेवी, ज्ञानेश्वर र रातोपुललगायत क्षेत्रमा बिहान १० बजेदेखि दिउँसो ३ बजेसम्म विद्युत् कटौती हुने प्राधिकरणले जनाएको छ ।
तोकिएको काम निर्धारित समयअघि नै सम्पन्न भए विद्युत् सेवा सोहीअनुसार सुचारु गरिनेछ ।
थप जानकारीका लागि प्राधिकरणले हटलाइन नम्बर ११५० मा सम्पर्क गर्न अनुरोध गरेको छ ।
