विश्व खबर 
काठमाडौं– अमेरिकी राष्ट्रपति डोनाल्ड ट्रम्पले सार्वजनिक सडकमा कर छुट प्राप्त रातो रङको डिजेल प्रयोग गर्न दिने कार्यकारी आदेशमा हस्ताक्षर गरेका छन्। कृषि मेसिनरी र अन्य अफ–रोड उपकरणमा प्रयोगमा कर छुट रहेको डिजेललाई सडकमा चल्ने सवारीसाधनमा पनि प्रयोग गर्न दिने आदेशमा ट्रम्पले हस्ताक्षर गरेका हुन् । यस निर्णयले बढ्दो इन्धन मूल्य घटाउन सहयोग पुग्ने विश्वास गरिएको छ।
मध्यावधि निर्वाचनअघि इन्धनको मूल्यवृद्धिले रिपब्लिकन पार्टीमाथि दबाब बढिरहेका बेला ट्रम्पको यस्तो निर्णय आएको छ। नेब्रास्कामा आयोजित र्यालीमा उनले अफ–रोड प्रयोगको सीमालाई हटाउँदै जोसुकैले जुनसुकै प्रयोजनका लागि करमुक्त रातो डिजेल किन्न सक्ने बताएका छन्।
रातो डिजेल सामान्य डिजेलकै प्रकार भए पनि यसमा राजमार्ग इन्धन कर लाग्दैन।
तर ह्वाइट हाउसको तथ्यपत्रमा कर पूर्ण रूपमा हटाउनेभन्दा वर्षको अन्त्यसम्म ब्याज वा जरिवाना नलिई कर स्थगित गर्ने तथा शुल्क हटाउने उपाय खोज्न अर्थमन्त्री स्कट बेसेन्टलाई रक्षामन्त्री पीट हेग्सेथसँग परामर्श गर्न निर्देशन दिइएको उल्लेख छ। सङ्घीय अधिकारी र राज्यका गभर्नरले निरीक्षण रोक्न तथा चालकको कर दायित्व माफ गर्न सक्ने पनि जनाइएको छ।
ट्रम्पले आगामी चार महिनामा रणनीतिक भण्डारबाट १० करोड ब्यारेल प्रशोधित डिजेल बजारमा पठाउने विषयमा युरोपसँग भएको सम्झौताको पनि प्रशंसा गरेका थिए।
अमेरिकामा डिजेलको मूल्य पछिल्ला सातामा प्रतिग्यालन ६ अमेरिकी डलरभन्दा माथि पुगेको छ। रुसको निर्यात प्रतिबन्ध तथा युक्रेनका आक्रमणका कारण विश्व बजारमा आपूर्ति दबाब बढेपछि मूल्य उकालो लागेको हो।
