विश्व खबर 
काठमाडौं– अमेरिकी राष्ट्रपति डोनाल्ड ट्रम्पले इरानसँग जारी युद्धपछि अपनाउने रणनीतिबारे खाडी सहयोग परिषद्का नेताहरूसँग छलफल गर्ने भएका छन् ।
संयुक्त राष्ट्रसंघको महासभाका क्रममा आगामी मंगलबार न्युयोर्कमा साउदी अरेबिया, यूएई, कतार, बहराइन, कुवेत र ओमानका नेतासँग ट्रम्पले भेटवार्ता गर्ने तयारी रहेको अमेरिकी सञ्चारमाध्यम एक्सियसले जनाएको छ ।
बैठकमा युद्धपछि इरानसँगको सम्बन्ध, क्षेत्रीय सुरक्षा तथा आर्थिक अवस्थाबारे अमेरिकी योजनामाथि छलफल हुने अपेक्षा गरिएको छ ।
ट्रम्प प्रशासनले युद्धपछिको अवस्थाका लागि ‘डे–आफ्टर’ योजना तयार गरिरहेको बताइएको छ ।
इरानसँगको युद्धका कारण खाडी मुलुकहरूले सैन्य तथा आर्थिक असर बेहोरेका छन् ।
यसैबीच, ट्रम्पले युद्ध अन्त्यतिर पुगेको आशा व्यक्त गर्दै इरान सम्झौताको तयारीमा रहेको दाबी गरेका छन् ।
इजरायली प्रधानमन्त्री बेन्जामिन नेतान्याहुले पनि न्युयोर्कमा ट्रम्पसँग भेट गर्न चाहेको बताइएको छ, तर भेटवार्ता भने तय भइसकेको छैन ।
