विश्व खबर 
काठमाडौं रोयल इन्फिल्डले नेपालमा हन्टर ३५० को नयाँ भेरियन्ट सार्वजनिक गरेको छ । कम्पनीले नयाँ टार्म्याक ब्ल्याक भेरियन्टसँगै उच्चस्तरीय भेरियन्टमा मुम्बई येल्लो र मुनसट ह्वाइट गरी दुई नयाँ रंग थपेको हो ।
नयाँ टार्म्याक ब्ल्याक भेरियन्टमा अलोय ह्विल्स, डिजी–एनालग उपकरण समूह, नयाँ चालक अन्तरमुख तथा एकल च्यानल एबीएसलगायत सुविधा छन् । राउन्ड ह्यालोजन हेडल्याम्प, घुमाउने स्विच, सिलाइ गरिएको सिट र स्पोर्टी ग्राब रेल पनि यसमा समावेश छन् ।
त्यस्तै, स्लिप एन्ड असिस्ट क्लचले गियर परिवर्तनलाई सहज बनाउने कम्पनीले जनाएको छ। हन्टर ३५० को सहज सवारी, चुस्त नियन्त्रण तथा ‘प्योर मोटरसाइक्लिङ’को मूल विशेषतालाई नयाँ भेरियन्टमा समेत निरन्तरता दिइएको कम्पनीको भनाइ छ ।
उच्चस्तरीय भेरियन्टमा थपिएका मुम्बई येल्लो र मुनसट ह्वाइट रंगले ग्राहकलाई आफ्नो रुचि र शैलीअनुसार मोटरसाइकल छनोट गर्ने थप विकल्प दिने कम्पनीले जनाएको छ ।
मुम्बई येल्लो मुम्बईको कला, चलचित्र तथा जीवन्त सहरी वातावरणबाट प्रेरित रहेको कम्पनीको भनाइ छ । मुनसट ह्वाइटमा ‘ओरायन’ अर्थात् शिकारी नक्षत्रबाट प्रेरित चित्र तथा आकाशीय तत्व प्रयोग गरिएको छ ।
रोयल इन्फिल्डका प्रमुख वाणिज्य अधिकृत यदविन्दर सिंह गुलरियाले हन्टर ३५० नेपालमा नयाँ पुस्ताका चालकबीच लोकप्रिय बन्दै गएको बताए। यसको डिजाइन, चुस्त नियन्त्रण र दैनिक प्रयोगमा सहजताले लोकप्रियता बढाएको उनको भनाइ छ ।
नेपालमा रोयल इन्फिल्डको आधिकारिक वितरक अल्फा अटोमोटिभका निर्देशक मेघराज पौडेलले पनि हन्टर ३५० ले नेपाली चालकबीच राम्रो स्थान बनाएको बताए। नयाँ भेरियन्ट र रंगले ग्राहकलाई थप विकल्प उपलब्ध गराउने उनले बताए ।
नेपालमा हन्टर ३५० को नयाँ टार्म्याक ब्ल्याक भेरियन्टको मूल्य ४ लाख ८७ हजार रुपैयाँ तोकिएको छ। मुम्बई येल्लो र मुनसट ह्वाइट रंगमा उपलब्ध उच्चस्तरीय भेरियन्टको मूल्य ५ लाख ११ हजार रुपैयाँ रहेको छ ।
नयाँ भेरियन्ट तथा नयाँ रंगका हन्टर ३५० को बुकिङ तथा बिक्री सेप्टेम्बर १६, २०२६ देखि नेपालभरका अधिकृत रोयल इन्फिल्ड विक्रेतामार्फत सुरु हुने कम्पनीले जनाएको छ ।
