विश्व खबर 
काठमाडौं– राष्ट्रिय प्रजातन्त्र पार्टी (राप्रपा)ले गरेको कारबाहीविरुद्ध बागमती प्रदेश संसदीय दलका नेता उद्धव थापाले पार्टी केन्द्रीय कार्यालय घेर्ने घोषणा गरेका छन् ।
थापाले बुधबार बिहान ११ बजे धुम्बाराहीस्थित राप्रपा केन्द्रीय कार्यालयमा विरोध कार्यक्रम गर्ने भन्दै समर्थक तथा सहकर्मीलाई उपस्थित हुन आह्वान गरेका छन् ।
बागमती प्रदेशमा सरकार गठनका क्रममा पार्टी केन्द्रको निर्णयविपरीत नेकपा एमाले नेतृत्वको सरकारलाई समर्थन गरेको आरोपमा थापासहित केही नेतामाथि राप्रपाले कारबाही गरेको थियो ।
थापाले एमालेका किरण थापालाई मुख्यमन्त्री बनाउन समर्थन गरेका थिए ।
आफूमाथिको कारबाही अन्यायपूर्ण भएको दाबी गर्दै थापाले लोकतान्त्रिक मूल्य, संगठनात्मक एकता र निर्वाचित जनप्रतिनिधिको सम्मान कायम गर्नुपर्ने माग अघि सारेका छन् ।
उनले कारबाही फिर्ता लिनसमेत माग गरेका छन् ।
यसअघि राप्रपाले काठमाडौं, चितवन, दोलखा र धादिङका जिल्ला कार्यसमितिलाई पत्र पठाउँदै कारबाहीमा परेका तथा कारबाही प्रक्रियामा रहेका व्यक्तिलाई पार्टीका कुनै पनि निकायमा सहभागी नगराउन निर्देशन दिएको थियो ।
राप्रपाले काठमाडौंका उद्धव थापा, राजेन्द्र प्रजापति र राजु विष्ट तथा चितवनका गिरबहादुर तामाङलाई साधारण सदस्यसमेत नरहने गरी निष्कासन गरेको जनाएको छ ।
दोलखाकी मोनिका श्रेष्ठ, काठमाडौंका नुरज बज्राचार्य र धादिङका डम्बर तामाङ कारबाही प्रक्रियामा छन् ।
एमाले–नेकपा नेतृत्वको सरकारलाई समर्थन गरेको विषयमा चर्किएको राप्रपाभित्रको विवाद थापाको कार्यालय घेर्ने घोषणासँगै थप सतहमा आएको छ ।
