विश्व खबर 
काठमाडौं– नेपाली कांग्रेसमा संस्थापन र इतर पक्षले छुट्टाछुट्टै महाधिवेशनको तयारी अघि बढाएसँगै पार्टीको १५औँ महाधिवेशन दुई वटा हुने सम्भावना बलियो बनेको छ ।
गगन थापा नेतृत्वको संस्थापन पक्षले असोज १६–१९ मा महाधिवेशन गर्ने तयारी गरेको छ ।
यसका लागि भृकुटीमण्डपस्थित प्रदर्शनी हल, बगैँचा र पार्किङस्थलसमेत बुक गरिएको छ ।
वडा, पालिका तथा प्रदेश–प्रतिनिधिसभा निर्वाचन क्षेत्रको अधिवेशनपछि सिधै महाधिवेशन गर्ने गरी कार्यतालिका अघि बढाइएको छ ।
यता शेरबहादुर देउवा पक्षले असोज १५ बाट वडा अधिवेशन सुरु गरी मंसिर २१–२३ मा केन्द्रीय महाधिवेशन गर्ने तयारी गरेको छ ।
देउवा पक्षका नेता भानु देउवाले दुईवटा महाधिवेशन हुने अवस्था बनेको बताए ।
सर्वोच्च अदालतमा पार्टीको आधिकारिकतासम्बन्धी मुद्दा विचाराधीन रहेकाले अहिले सहमतिको सम्भावना कम रहेको उनको भनाइ छ ।
सर्वोच्चले यसअघि थापा नेतृत्वको कार्यसमितिलाई कानुनी वैधता दिने निर्वाचन आयोगको निर्णयसम्बन्धी फैसला पुनरावलोकनका लागि अनुमति दिएपछि देउवा पक्ष अन्तिम फैसलाको पर्खाइमा छ ।
शेखर–शशांक एक ठाउँ
दुई पक्षबीच सहमतिको प्रयास गरिरहेका नेता शेखर कोइराला असोज ३ गतेसम्म एकताको प्रयास गर्ने तयारीमा छन् ।
सहमति नभए आफू कुन पक्षमा उभिने भन्ने निर्णय केही दिनभित्र गर्ने उनीनिकट नेताहरूले बताएका छन् ।
शेखरनिकट नेता सञ्जय गौतमका अनुसार शेखर र उनका भाइ शशांक कोइराला दुई दाजुभाइ एकै ठाउँमा रहने सम्भावना बलियो छ ।
विशेष महाधिवेशनमा सहभागी नभएका नेताहरूबीच साझा धारणा बनाउने प्रयास भइरहेको छ ।
शेखर पक्षले देउवाबिनाको कांग्रेस एकता अर्थपूर्ण नहुने निष्कर्ष निकालेको छ ।
पार्टीको बृहत्तर एकता र मुलुकको राजनीतिक परिस्थितिलाई ध्यानमा राखेर एकताबद्ध कांग्रेसलाई प्राथमिकता दिने उनीनिकट नेताहरूको भनाइ छ ।
पूर्णबहादुर तटस्थ बस्ने सम्भावना
निवर्तमान कार्यवाहक सभापति पूर्णबहादुर खड्का भने दुई पक्षमध्ये कुनैमा नउभिने मनस्थितिमा देखिएका छन् ।
खड्कानिकट नेता श्याम घिमिरेका अनुसार सर्वोच्च अदालतमा मुद्दा विचाराधीन रहेको अवस्थामा थापा पक्षले गर्ने महाधिवेशनमा सहभागी हुन नैतिक समस्या हुने खड्काको धारणा छ ।
‘चोइटिएको पार्टीमा म जाँदिनँ’ भन्ने धारणा खड्काले राखेको घिमिरेले बताए ।
यद्यपि खड्कानिकट केही नेताहरू भने थापा पक्षको महाधिवेशन प्रक्रियामा सहभागी हुने तयारीमा छन् ।
कांग्रेसको सम्पूर्ण एकता हुनुपर्ने पक्षमा रहेका खड्काले औपचारिक निर्णय भने गरिसकेका छैनन् ।
