विश्व खबर 
काठमाडौं– उत्तर कोरियाली नेता किम जोङ–उनले रूससँगको सम्बन्धको भविष्यप्रति आफू आशावादी रहेको बताए ।
दुई देशबीचको सम्बन्ध अझ सुदृढ हुने अपेक्षा गर्न पाउनुमा आफूलाई गर्व लागेको उनले बताएका छन् ।
आधिकारिक कोरियाली केन्द्रीय समाचार संस्था (केसीएनए)का अनुसार, कोरियाली ‘मुक्ति दिवस’को ८१औँ वार्षिकोत्सवका अवसरमा रूसी राष्ट्रपति भ्लादिमिर पुटिनले पठाएको शुभकामना सन्देशको जवाफ दिँदै किमले शनिबार यस्तो धारणा व्यक्त गरेका हुन् ।
किमले पुटिनको नेतृत्वमा रूसी सेना र जनताले आफ्नो सार्वभौमिकता, सुरक्षाहित तथा क्षेत्रीय अखण्डताको रक्षा गर्दै शक्तिशाली रूस निर्माणको लक्ष्य पूरा गर्ने विश्वास व्यक्त गरेका छन् ।
उनले रूसी राष्ट्रपतिको कार्यकालमा थप सफलताको कामनासमेत गरे ।
उत्तर कोरियाले सन् १९४५ अगस्त १५ मा जापानी औपनिवेशिक शासनबाट कोरियाली प्रायद्वीप मुक्त भएको दिनको सम्झनामा हरेक वर्ष अगस्त १५ लाई ‘मुक्ति दिवस’का रूपमा मनाउँदै आएको छ ।
