एसियन गेम्स : इन्डोनेसियाविरुद्ध नेपालको सानदार जित

बिहीबार मलेसियाको बायोमास ओभलमा भएको समूह ‘बी’ को अन्तिम खेलमा नेपालले इन्डोनेसियालाई ४ विकेटले पराजित गरेको हो ।

११४ रनको लक्ष्य नेपालले ३ बल बाँकी रहँदा ६ विकेट गुमाएर पूरा गर्‍यो ।

नेपालकी कप्तान इन्दु बर्माले अविजित ४२ रनको महत्वपूर्ण पारी खेलिन् ।

सोनी पाख्रिनले २९, कविता कुँवरले १४ र सीता रानामगरले अविजित १३ रन बनाए ।

इन्डोनेसियाका नी एरियानी र नी मेड पुत्री सुवान्देवीले २/२ विकेट लिए भने डारा परमिथा र साङ मेप्रियानीले १/१ विकेट लिए ।

पहिले ब्याटिङ गरेको इन्डोनेसियाले २० ओभरमा ४ विकेट गुमाएर ११३ रन बनाएको थियो ।

कप्तान नी पुतु आयु नन्द सकरिनीले अविजित ५६ रन बनाइन् भने नी लुह देवीले २३ र नी मेड पुत्री सुवान्देवीले १३ रन जोडे ।

नेपालकी मनिषा उपाध्यायले २ विकेट र रिया शर्माले १ विकेट लिइन् ।

नेपालले दुई खेलमा चार अंक जोड्दै सेमिफाइनल पक्का गरेको हो ।

इन्डोनेसिया भने दुवै खेलमा हार बेहोर्दै बाहिरिएको छ ।

पहिलो खेलमा नेपालले चीनलाई १९ रनले हराएको थियो ।

सेमिफाइनलमा नेपालले मलेसियासँग खेल्नेछ भने अर्को सेमिफाइनलमा थाइल्यान्ड र चीन आमनेसामने हुनेछन् ।