विश्व खबर 
काठमाडौं– अमेरिकी राष्ट्रपति डोनल्ड ट्रम्पले इरानसँग शान्ति सम्झौता हुने सम्भावनाप्रति फेरि आशावाद व्यक्त गरेका छन् ।
उनले इरानमाथि तयारीमा रहेको सैन्य आक्रमण तत्कालका लागि रोकेको पनि बताएका छन् ।
ट्रम्पका अनुसार कतार, साउदी अरेबिया र यूएईको आग्रहपछि आक्रमण रोकिएको हो, किनकि अहिले इरानसँग गम्भीर वार्ता अघि बढ्ने संकेत देखिएको छ ।
उनले इरानले परमाणु हतियार विकासका सबै प्रयास त्याग्नुपर्ने शर्त दोहोर्याएका छन् ।
यद्यपि हप्तौँदेखि चलिरहेको अप्रत्यक्ष वार्तामा ठोस प्रगति भएको छैन ।
ट्रम्पले सम्झौता भए शान्ति सम्भव हुने, तर सहमति नभए अमेरिका तत्काल ठूलो स्तरको सैन्य कारबाही गर्न तयार रहने चेतावनी दिएका छन् ।
इरानतर्फबाट भने अमेरिकालाई रणनीतिक गल्ती नगर्न चेतावनी दिइएको छ ।
तेहरानले आफ्ना अघिल्ला सन्देशहरू पुनः दोहोर्याउँदै वार्ता जारी रहेको जनाएको छ ।
युद्ध र तनावबीच अमेरिका भित्रै पनि ट्रम्पको इरान नीति अलोकप्रिय बन्दै गएको देखिएको छ ।
हालैका सर्वेक्षणहरूमा अधिकांश मतदाताले युद्धको विरोध गरेको उल्लेख छ ।
