विश्व खबर 
काठमाडौं– नेपाल सरकारले युक्रेनमा युद्धबन्दी बनेका नेपाली नागरिकलाई स्वदेश फर्काउन कूटनीतिक पहल तीव्र बनाएको छ ।
परराष्ट्र मन्त्रालयका अनुसार युक्रेनमा रहेका ११ नेपाली युद्धबन्दी परिवारको सम्पर्कमा छन् र उनीहरूलाई फर्काउने प्रयास भइरहेको छ ।
परराष्ट्रमन्त्री शिशिर खनालले युक्रेनी समकक्षीसँग वार्ता गर्दै नेपाली युद्धबन्दीको रिहाइका लागि पहल गरिदिन आग्रह गरेका थिए ।
मन्त्रालयका प्रवक्ता लोकबहादुर क्षेत्रीका अनुसार युक्रेनबाट सकारात्मक प्रतिक्रिया आएको छ ।
रूसी सेनामा कार्यरत नेपालीको आधिकारिक तथ्याङ्क नभए पनि करिब २०० जनाको मृत्यु, १५० भन्दा बढी बेपत्ता र पाँच सयभन्दा बढी नेपाली संलग्न रहेको अनुमान गरिएको छ ।
युद्धमा मारिएका केही नेपालीका परिवारले क्षतिपूर्ति पाउन थालेका छन् ।
प्रतिवेदनअनुसार एजेन्टमार्फत लाखौँ रुपैयाँ तिरेर नेपाली युवाहरू रूस पुग्ने गरेका छन् ।
उचित सैन्य तालिम र भाषा ज्ञानविनै उनीहरूलाई युद्धको अग्रपंक्तिमा पठाइने गरिएको बताइएको छ ।
नेपाल सरकारले रूस–युक्रेन युद्धपछि श्रम स्वीकृतिमा रोक लगाए पनि पछि पुनः केही संस्थागत स्वीकृति खुला गरिएको थियो ।
