विश्व खबर 
काठमाडौं– काठमाडौं महानगरपालिका कार्यवाहक मेयर सुनिता डंगोलले नेकपा (एमाले) परित्याग गर्ने निर्णय गरेको खुलासा भएपछि राजनीतिक वृत्तमा तरंग पैदा भएको छ ।
डङ्गोलको यो निर्णयसँगै एमालेभित्र र स्थानीय तहको सत्ता समीकरणमा समेत नयाँ बहस सुरु भएको छ ।
स्मरणीय रहोस्, डङ्गोल स्वतन्त्र विचारधाराबाट प्रेरित व्यक्तित्वका रूपमा परिचित रहँदै आएकी थिइन् ।
तर, २०७९ सालको स्थानीय तह निर्वाचनमा उपमेयर पदका लागि उम्मेदवारी दिने क्रममा उनले एमालेको सदस्यता लिएकी थिइन् ।
अहिले काठमाडौं महानगरको कार्यवाहक मेयरको जिम्मेवारी सम्हाल्दै आएकी छिन् ।
तर, पछिल्लो समय पार्टीसँगको सम्बन्धमा दूरी बढ्दै गएको संकेतहरू देखिँदै आएका थिए ।
अन्ततः एमाले परित्याग गर्ने निर्णय बाहिरिएपछि पार्टी पंक्तिमा असन्तुष्टि र छलफल दुवै तीव्र बनेको बताइएको छ ।
डङ्गोलको निर्णयले काठमाडौं महानगरको आगामी राजनीतिक समीकरण, कार्यपालिका–पार्टी सम्बन्ध तथा स्वतन्त्र राजनीति गर्ने प्रवृत्तिमा समेत प्रभाव पार्न सक्ने विश्लेषण गरिएको छ ।
यस विषयमा एमाले नेतृत्व र डङ्गोल पक्षबाट औपचारिक प्रतिक्रिया आएको छैन ।
