विश्व खबर 
काठमाडौं– अमेरिकी मध्यावधि निर्वाचनको नतिजामा अर्बपति व्यवसायी एलन मस्कको भूमिकालाई लिएर पनि चर्चा भइरहेको छ ।
ओपनसिक्रेट्सले अमेरिकी चुनावी चन्दासम्बन्धी दस्तावेजहरूको विश्लेषण गर्दै सार्वजनिक गरेको विवरणअनुसार मस्कले रिपब्लिकन पार्टीका उम्मेदवार र रूढिवादी विचारधारा बोकेका संस्थाहरूलाई समर्थन गर्न कम्तीमा ४५ करोड ५० लाख अमेरिकी डलर अर्थात् करिब ४३ अर्ब रुपैयाँ खर्च गरेका छन् ।
यो कुनै एक व्यक्तिले चुनावी अभियानमा खर्च गरेको अहिलेसम्मकै सबैभन्दा ठूलो रकम हो ।
टेक्सासमा भएको सिनेट निर्वाचनका क्रममा मस्कले रिपब्लिकन उम्मेदवार केन प्याक्सटनको समर्थनमा मात्रै २० करोड अमेरिकी डलरभन्दा बढी खर्च गरेका थिए । तर ठूलो रकम खर्च गरेर समर्थन गरे पनि प्याक्सटन डेमोक्रेटिक पार्टीका उम्मेदवार जेम्स तालारिकोसँग पराजित भए ।
केही वर्षअघि मस्कले आफ्नो बसोबास र केही व्यावसायिक गतिविधि टेक्सासमा सारेका थिए ।
निर्वाचनमा जित हासिल गरेपछि दिएको सम्बोधनमा तालारिकोले आफ्ना समर्थकहरूलाई भने, ‘हामीले यो राज्य र देशका प्रत्येक अर्बपति दातालाई, प्रत्येक खर्बपति दातालाई र खराब राजनीतिक व्यवस्थाको संरक्षण गर्ने भ्रष्ट व्यक्तिहरूलाई एउटा सन्देश दिएका छौं- सत्ता जनताको हातमा छ ।’
यसअघि सामाजिक सञ्जाल एक्समा लामो समयसम्म मौन बसेका मस्कले पोस्ट गर्दै व्यङ्ग्यात्मक टिप्पणी गरेका थिए, ‘लाग्छ, यस पटकको चुनावमा हस्तक्षेप गर्न प्रयोग गरेका मेरा अन्तरिक्ष लेजरहरूले काम गरेनन् ।’
