विश्व खबर 
काठमाडौं– इरानले विश्वकै महत्वपूर्ण समुद्री मार्ग मानिने स्ट्रेट अफ होर्मुज पूर्ण रूपमा बन्द नगरेको जनाएको छ।
इरानका विदेशमन्त्री Abbas Araghchi का अनुसार अमेरिका र इजरायलका जहाजलाई मात्र उक्त मार्ग प्रयोग गर्न रोक लगाइएको हो, अन्य देशका जहाज भने आवतजावत गर्न सक्नेछन्।
उनले एक अन्तर्वार्तामा सुरक्षा कारणले धेरै जहाज कम्पनीहरूले होर्मुज मार्ग प्रयोग नगरेको बताए। केही तेल ट्यांकर र व्यापारिक जहाज भने अझै पनि सो मार्ग हुँदै सञ्चालन भइरहेका छन्।
तर आक्रमणको जोखिमका कारण सयौं जहाज रोकिँदा विश्वव्यापी तेल आपूर्ति प्रभावित भएको अन्तर्राष्ट्रिय मिडियाले जनाएका छन्।
यसैबीच अमेरिकाले इन्धन ढुवानीमा अवरोध गरेको आरोप लगाउँदै इरानको महत्त्वपूर्ण तेल भण्डारण क्षेत्र Kharg Island मा आक्रमण गरेको छ।
Strait of Hormuz विश्वको सबैभन्दा संवेदनशील समुद्री मार्गमध्ये एक हो, जहाँबाट विश्वको करिब २० प्रतिशत तेल ढुवानी हुन्छ। यो मार्ग बन्द वा अवरुद्ध हुँदा विश्व ऊर्जा बजारमा ठूलो असर पर्न सक्छ।
अमेरिकी राष्ट्रपति Donald Trump ले समुद्री मार्ग खुला राख्न चीन, फ्रान्स, जापान, दक्षिण कोरिया र बेलायतलगायत देशहरूले युद्धपोत पठाउन सक्ने बताएका छन्।
