विश्व खबर 
काठमाडौं- बाजुरामा एक महिलाले बाटोमै नवजात शिशु जन्माएकी छन् ।
जिल्लाको स्वामीकार्तिक खापर गाउँपालिका-२ भैसागाडकी एक महिलाले स्वास्थ्य संस्था पुग्न नपाउँदै बाटोमै नवजात शिशु जन्माएकी हुन् ।
प्रसूति व्यथा सुरु भएपछि उनलाई परिवारले फयालगाउँ आधारभूत स्वास्थ्य इकाइतर्फ लैजाँदै गर्दा बाटोमै सुत्केरी भएकी बताइएको छ ।
स्वास्थ्य संस्था पुग्न नसक्ने अवस्था भएपछि त्यहाँ कार्यरत स्वास्थ्यकर्मी विस्ना रोकाया घटनास्थलमै पुगेर सुरक्षित प्रसूति गराएकी थिइन् ।
स्थानीयका अनुसार कठिन भौगोलिक अवस्था र स्वास्थ्य संस्था टाढा भएकाले महिलालाई समयमै अस्पताल पुर्याउन नसक्दा बाटोमै सुत्केरी हुनुपरेको हो ।
स्वास्थ्यकर्मी रोकायाले तत्कालै आवश्यक स्वास्थ्य सेवा प्रदान गरेपछि आमाले सुरक्षित रूपमा बच्चा जन्माएकी थिइन् । आमा र नवजात शिशुको अवस्था सामान्य रहेको जनाइएको छ ।
स्वास्थ्य कार्यालय कैलाली प्रमुख रमेश कुँवरले सामाजिक सञ्जालमा उक्त फोटो सेयर गर्दै ‘दुरदराजमा गार्हो छ । स्वास्थ्य संस्था टाढा छन् । स्वास्थ्य संस्थासम्म समयमै बोकेर लैजान युवाहरु छैनन ! केही समय अगाडि नै प्रसुती केन्द्रमा गएर बस्न रुचाउदैनन !’ भनेर लेखेका छन् ।
स्थानीय बासिन्दाका अनुसार दुर्गम क्षेत्रका कारण गर्भवती महिलाहरूलाई समयमै स्वास्थ्य संस्थासम्म पुर्याउन समस्या हुने गरेको छ ।
सडक र यातायातको सुविधा अभावका कारण अझै पनि धेरै महिलाले घरमै वा बाटोमै बच्चा जन्माउने अवस्था रहेको उनीहरूको भनाइ छ ।
स्वास्थ्य क्षेत्रमा पहुँच विस्तार भए पनि दुर्गम बस्तीहरूमा अझै सुरक्षित प्रसूति सेवामा चुनौती देखिएको यो घटना एउटा उदाहरण भएको स्थानीयले बताएका छन् ।
