विश्व खबर 
काठमाडौं- इजरायलले इरानको राजधानी तेहरानमा अर्को ठूलो आक्रमण गरेको छ ।
अन्तर्राष्ट्रिय सञ्चारमाध्यमका अनुसार राष्ट्रपति कार्यालयसमेत लक्षित भएको इजरायली पक्षको दाबी छ । तेहेरानमा रहेका एक पत्रकारले बीबीसीलाई बताए अनुसार शनिबारदेखि भइरहेको एकपछि अर्को आक्रमणमध्ये पछिल्लोपटक उक्त हमला भएको हो ।
इरानी रेड क्रिसेन्टका अनुसार अमेरिका–इजरायलले आक्रमण सुरु गरेयता इरानमा मृत्यु हुनेको संख्या ७८७ पुगेको छ। घाइतेहरूको संख्या पनि उल्लेख्य रहेको जनाइएको छ।
यसअघि शनिबार अमेरिका र इजरायलले संयुक्त रूपमा इरानमाथि हमला गर्दा सर्वोच्च नेता आयातोल्लाह अली खामेनेईको मृत्यु भएको थियो । त्यसको पुष्टि इरानी राष्ट्रिय सञ्चारमाध्यमले समेत गरिसकेको छ ।
इजरायलका रक्षामन्त्रीले लेबनानतर्फ जमीनी सेना अघि बढाएर ‘थप रणनीतिक क्षेत्र कब्जा गर्ने’ चेतावनी दिएका छन् । ताकि इजरायलमाथि भइरहेका आक्रमण रोक्न सकियोस्।
साउदी अरेबियाको राजधानी रियादस्थित अमेरिकी दूतावासमा दुईवटा ड्रोन आक्रमण भएको छ । जुन इरानबाट प्रक्षेपित भएको हुनसक्ने आशंका गरिएको छ।
अन्तर्राष्ट्रिय बजारमा युद्धको असर देखिएको छ। कच्चा तेल र ग्यासको मूल्य बढेको छ भने सेयर बजारमा गिरावट आएको छ।
उता अमेरिकी राष्ट्रपति डोनाल्ड ट्रम्पले बेलायती प्रधानमन्त्री कियर स्टार्मरले प्रारम्भमा बेलायती सैन्य अड्डाहरू प्रयोग गर्न नदिएको विषयमा पुनः आलोचना गरेका छन् । (बीबीसी)
