विश्व खबर 
काठमाडौं– राष्ट्रिय सभा सदस्य निर्वाचनअन्तर्गत आइतबार सातै प्रदेशमा मतदान भइरहेको छ ।
लुम्बिनी प्रदेशमा घोराहीस्थित कर्मचारी मिलन केन्द्रमा मतदान जारी छ ।
निर्वाचन आयोगका अनुसार बिहान साढे १० बजेसम्म १२८ मत खसेका छन् ।
तीमध्ये प्रदेश सभा सदस्यतर्फ ४९ र स्थानीय तहतर्फ ७९ जनाले मतदान गरेका छन् ।
मतदान दिउँसो ३ बजेसम्म हुनेछ ।
लुम्बिनीमा महिला, अपांगता तथा अल्पसंख्यक र अन्य समूहका गरी तीन रिक्त सिटका लागि मतदान भइरहेको छ ।
कांग्रेस–एमाले गठबन्धनबाट एमालेकी रामकुमारी झाक्री, कांग्रेसका चन्द्रबहादुर केसी र वासुदेव घिमिरे उम्मेदवार छन् ।
लुम्बिनी प्रदेशमा कुल मतभार ८५२२ छ ।
यसमा सबैभन्दा धेरै मतभार नेपाली कांग्रेसको ३१७९ र एमालेको २८१० रहेको छ ।
यस्तै, कर्णाली प्रदेशमा बिहान ११ बजेसम्म १६८ जनाले मतदान गरेका छन् भने मधेस प्रदेशमा १६३ जनाले मतदान गरिसकेका छन् ।
मधेसमा चार सिटका लागि ११ उम्मेदवार चुनावी प्रतिस्पर्धामा छन् ।
