विश्व खबर 
दुबई— एसिया कप–२०२५ को फाइनलमा भारतले पाकिस्तानलाई पाँच विकेटले पराजित गर्दै उपाधि जितेपछि दुवै टोलीबीच विवाद उत्पन्न भएको छ ।
पाकिस्तानका कप्तान सलमान अघाले भारतीय टोलीको व्यवहारलाई ‘क्रिकेटप्रति अनादर’ भनेका छन् भने भारतीय कप्तान सूर्यकुमार यादवले च्याम्पियन टोलीलाई ट्रफी दिन नदिइएकोमा असन्तोष व्यक्त गरेका छन् ।
आइतबारको फाइनलमा दुवै टोलीले हात नमिलाए । भारतीय टोलीले पाकिस्तान क्रिकेट बोर्ड अध्यक्ष तथा एसिसी प्रमुख मोहसिन नकवीबाट ट्रफी लिन अस्वीकार गरेपछि विजय समारोहमा समेत सहभागी भएन ।
सूर्यकुमारले भने, “मैले कहिल्यै देखेको थिइनँ कि विजेतालाई ट्रफी दिन नमानियोस् । हाम्रो वास्तविक ट्रफी खेलाडी र स्टाफ हुन्। ठूलो पर्दामा विजेता देखिनु नै गौरव हो ।”
समारोहमा उद्घोषक साइमन डुलले सार्वजनिक रूपमा भने, “भारतीय टोलीले पुरस्कार ग्रहण नगर्ने निर्णय गरेको एसिसीले जानकारी दिएको छ, आजको समारोह यहीँ समाप्त हुन्छ ।”
पाकिस्तानी कप्तान सलमानले भने, “भारतले हाम्रो हात नमिलाएर अनादर गरेको सोच्दा हो, तर वास्तवमा उनीहरूले खेलको नै अनादर गरेका छन् । हामीले खेलको स्पिरिट अनुसार पदक लिएर फर्कियौँ ।”
यस पटकको एसिया कप दुवै छिमेकीबीच हालैको तनावका कारण विशेष संवेदनशील मानिएको थियो। सलमानले चेतावनी दिँदै भने, “यदि यस्तो व्यवहार चलिरह्यो भने भविष्यमा यसको परिणाम अकल्पनीय हुन्छ, जुन क्रिकेटका लागि राम्रो होइन।”
